Digital Pen ပါဝင်တဲ့ Huawei Mate X2 ဒီဇိုင်း မူပိုင်ခွင့်ပုံရိပ်တွေ ထွက်ပေါ်လာပြီ

စမတ်ဖုန်းလောကကြီးဟာ Huawei ရဲ့ Mate X2 ကိုမျှော်လင့်နေပေမယ့် တရုတ်အခြေစိုက်ကုမ္ပဏီကြီးကတော့ မျိုးဆက်သစ် Foldable နဲ့ပတ်သက်ပြီး တိတ်ဆိတ်နေတုန်း ဖြစ်ပါတယ်။ ပြီးခဲ့တဲ့နှစ်တုန်းကတော့ Mate X2 ဟာ ဒီနှစ်ရဲ့ တတိယသုံးလပတ်အတွင်းမှာ ကြေညာဖွယ်ရှိတယ်လို့ သတင်းတွေထွက်ခဲ့ဖူးပါတယ်။

Huawei Mate X တုန်းကတော့ မျက်နှာပြင် ကြံ့ခိုင်မှုပိုင်းဆိုင်ရာမှာ အားနည်းချက်အချို့ရှိခဲ့ပါတယ်။ ဒါ့အပြင် တရုတ်ပြည်တွင်းဈေးကွက်မှာရောင်းအားကောင်းခဲ့တယ်ဆိုပေမယ့် ပိုပြီးကျယ်ပြန့်တဲ့ဈေးကွက်တွေဆီမှာ အစမ်းသပ်ခံဖို့ လိုအပ်နေပါသေးတယ်။ အခုတော့ နောက်ထပ်မျိုးဆက်သစ် Mate X အကြောင်းတောင် ပြောနေကြပါပြီ။

ကနဦးတုန်းကတော့ Huawei Mate Xs ဟာ Mate X foldable ကို အဆင့်မြှင့်ထားတယ်လို့ ပြောခဲ့ကြပါတယ်။ လာမယ့် MWC 2020 မှာ မြင်တွေ့ရနိုင်တယ်လို့ ဆိုခဲ့ကြပါတယ်။ အခုပြောမှာက Mate X2 ရဲ့ မူပိုင်ခွင့်ပုံအကြောင်းပါ။ Mate X နဲ့ တည်ဆောက်ထားပုံခြင်းတူတယ်ဆိုပေမယ့် Digital Pen လည်းပါဝင်နေတာကတော့ နည်းနည်း “ဆာ” တယ်လို့ဆိုရပါလိမ့်မယ်။

Huawei ဟာ Mate X2 ရဲ့ဒီဇိုင်းကို EUIPO မှာ မူပိုင်ခွင့်တင်ခဲ့တယ်လို့ ယုံကြည်ရပါတယ်။ Mate x နဲ့ ပိုတူတယ်ဆိုပေမယ့် Digital Pen ကြောင့် Samsung ရဲ့ Idea တွေလားလို့တောင် မေးချင်စရာပါ။ Pen ကို ကင်မရာတပ်ဆင်ထားတဲ့ ဘေးဘက် Side-bar ထဲမှာ ထည့်သွင်းပေးထားတာပါ။

မူပိုင်ခွင့်ဒီဇိုင်းအရ Mate X2 ဟာ ကျောဘက်ကင်မရာ လေးလုံးပါဝင်သလို Dual selfie ကင်မရာလည်း တပ်ဆင်ပေးထားတာကိုတွေ့ရပါတယ်။ မျက်နှာပြင်ကလည်း အတွင်းဘက်မှာ ရှိတာကိုတွေ့ရပါတယ်။ ပရိုဆက်ဆာကတော့ Kirin 990 5G ကို အသုံးပြုထားမယ်လို့ ယူဆရပါတယ်။

Ref: Android community