Google ဟာ Pixel 7 နဲ့ Pixel 7 Pro ဖုန်းတွေကို မကြာသေးခင်ကမှ မိတ်ဆက်ထားခဲ့တာဖြစ်ပါတယ်။ အဆိုပါ Pixel 7 Series ဖုန်းတွေဟာ Google ရဲ့ ကိုယ်ပိုင် Tensor Gen 2 Chipset ကို အသုံးပြုထားတာဖြစ်သလို မနှစ်တုန်းက Pixel 6 Series ထက် အကုန်လုံးကို အဆင့်မြှင့်တင်ထားခဲ့တာဖြစ်ပါတယ်။
အထူးသဖြင့် Camera ပိုင်းမှာ Google ကနေ Pixel 7 Pro ဖုန်းကို သိသိသာသာအဆင့်မြှင့်တင်မှုတွေ ပြုလုပ်ထားခဲ့ပြီး အခုဆိုရင်လည်း DxOMark ရဲ့ အဆင့်သတ်မှတ်ချက်တွေထဲမှာ ကင်မရာအကောင်းဆုံးဖုန်းအဖြစ် နံပါတ် (၁) နေရာကိုရရှိထားပြီးဖြစ်ပါတယ်။ ဒါပေမယ့် အခု XDA Developers ကနေ တွေ့ရှိချက်အရ Pixel 7 Pro ဟာ Display ပိုင်းမှာတော့ အားနည်းနေတဲ့ပုံစံပါပဲ။
ဘာကြောင့်လဲဆိုရင် Google Pixel 7 Pro ဖုန်းကို အမြင့်ဆုံး Brightness ဖြင့် အသုံးပြုတဲ့အချိန်မှာ တခြားသောစမတ်ဖုန်းတွေထက် ပါဝါစားသုံးမှုအလွန်မြင့်မားနေတာပဲဖြစ်ပါတယ်။ ဘယ်လောက်ထိ ပါဝါစားသုံးမှုမြင့်မားသလဲဆိုရင် Full Brightness နဲ့ အချိန် ၁၅ မိနစ်ခန့်အသုံးပြုတာက Battery ကို 10% အထိ လျော့ကျသွားတယ်လို့ သိရပါတယ်။
စစ်ဆေးချက်တွေအရ Pixel 7 Pro ဖုန်းမှာ အသုံးပြုထားတဲ့ Display ဟာ သာမန် 600nits Brightness ဝန်းကျင်နဲ့အသုံးပြုတဲ့အချိန်မှာ 3.5 ကနေ 4W အတွင်းပဲ ပါဝါစားပြီးတော့ Full Brightness ဖြစ်တဲ့ 1500nits မှာတော့ အမြင့်ဆုံး 6W အထိ ပါဝါစားနေတာဖြစ်ပါတယ်။ တစ်ဖက်မှာ နှိုင်းယှဥ်ရမယ်ဆိုရင် Galaxy S22 Ultra ဖုန်းဟာ 1000nits Brightness အခြေအနေမှာ 4W ပဲပါဝါစားသုံးမှုရှိနေတာဖြစ်ပါတယ်။
ဒါပေမယ့် အခုလိုမျိုး Display က သိသိသာသာ Battery ပိုစားနေတာက Pixel 7 Pro ဖုန်းမှာပဲကြုံတွေ့ရတာဖြစ်ပြီး ပုံမှန် Pixel 7 ဖုန်းမှာတော့ အခုပြဿနာမရှိဘူးလို့ သိရပါတယ်။ Google ဘက်ကတော့ အခုပြဿနာအတွက် ဖြေရှင်းမှုမရှိသေးပေမယ့် နောက်ပိုင်း Software Update ကနေတစ်ဆင့် ပြင်ဆင်ပေးနိုင်ဖွယ်ရှိနေပါတယ်။
Ref – Gizmo China
