လပေါင်းများစွာ သတင်းတွေ ထွက်ခဲ့တဲ့ Pixel 6 နဲ့ 6 Pro ကို တရားဝင် ကြေညာလိုက်ပါပြီ။ အရင်နှစ်က မော်ဒယ်တွေမှာ စွမ်းရည်သင့် Hardware တွေပဲ ထည့်သွင်းထားပေမယ့် Pixel အသစ်တွေမှာ စွမ်းဆောင်ရည်နဲ့ ဓါတ်ပုံ အပိုင်းကို အသားပေးထားတဲ့ စွမ်းရည်မြင့် Hardware တွေနဲ့ အဆင့်မြှင့်ထားပါတယ်။
Google ကိုယ်တိုင် ဖန်တီးထားတဲ့ Tensor Chip အကြောင်း စပြောချင်ပါတယ်။ 5nm SoC မှာ Octa-core Processor တပ်ဆင်ထားပြီး စွမ်းရည်မြင့် Cortex-X1 Core ၂ လုံး၊ စွမ်းရည်သင့် Core ၂ လုံးနဲ့ စွမ်းအင်စားသုံးမှု သက်သာစေတဲ့ Core ၄ လုံး ပါပါတယ်။ Custom Image Processor ကြောင့် Pixel 6 ဖုန်းတွေရဲ့ ကွန်ပြူတာ အခြေပြု ဓါတ်ပုံ နည်းပညာဟာ နောက် ၁ ဆင့်မြင့်သွားပါတယ်။
Magic Eraser က ဓါတ်ပုံမှ မလိုလားအပ်တဲ့ အရာတွေကို အလိုအလျှောက် ဖယ်ရှားပေးပြီး Face Unblur က ကြည်လင်ပြတ်သားတဲ့ မျက်နှာကို ဖမ်းယူပေးနိုင်ပါတယ်။ Portrait Mode က Subject ကို ခွဲခြားရာမှာ ပိုကောင်းလာသလို Skin Tone ထုတ်လုပ်မှု ပိုတိုးတက်လာပါတယ်။ Night Mode နဲ့ Astrophotography တို့ဟာလည်း အရင် Pixel တွေထက် ပိုကောင်းလာပြီး Motion Mode က လျှင်မြန်စွာ ရွေ့လျားနေတဲ့ Object ကို ကြည်လင်ပြတ်သားစွာ ဖမ်းယူပေးနိုင်ပါတယ်။
Pixel 6 နဲ့ 6 Pro မှာ ကင်မရာ Viewfinder က Message, Caption နဲ့ Text တွေကို ဘာသာပြန်ပေးနိုင်တဲ့ Live Translate ပါလာပြီး ဘာသာစကား ၅၅ ခုကို ထောက်ပံ့ပါတယ်။ Tensor Chip မှာ Titan M2 Security Chip တပ်ဆင်ထားပြီး ဖုန်းက ဒေတာတွေ ခိုးယူခံရခြင်းမှ ကာကွယ်ပေးပါတယ်။ Google က Pixel 6 Series အတွက် Security Update ကို ၅ နှစ်အထိ ပေးမယ်လို့ ပြောပါတယ်။
Pixel 6 Pro ဟာ Pixel 6 ထက် ပိုကြီးသလို အားသာချက်တွေ ရှိပါတယ်။ ပိုကြီးတဲ့ ၆.၇ လက်မ မျက်နှာပြင်ပါလာပြီး ပိုကြည်လင်တဲ့ 1440p Resolution ထောက်ပံ့ထားပါတယ်။ ပိုမြန်တဲ့ 120Hz Refresh Rate ထည့်သွင်းထားပြီး LTPO AMOLED က ဘက်ထရီစားတာ သက်သာစေတဲ့ Variable Refresh Rate ထောက်ပံ့ပေးပါတယ်။ Pixel 6 မှာတော့ ၆.၄ လက်မ 1080p AMOLED မျက်နှာပြင် တပ်ဆင်ထားပြီး 90Hz Refresh Rate အထိပဲ ရရှိပါတယ်။ ဖုန်း ၂ လုံးစလုံးကို Gorilla Glass Victus နဲ့ ကာကွယ်ထားပေမယ့် 6 Pro ရဲ့ မျက်နှာပြင်က ပိုကွေးညွှတ်ကာ Google က 3D Glass လို့ ခေါ်ပါတယ်။ ဖုန်း ၂ လုံးစလုံးမှာ မျက်နှာပြင်အောက် လက်ဗွေရာ ကိရိယာတွေ ပါပါတယ်။
Pixel 6 Pro ဟာ ကင်မရာအပိုင်းမှာ ပိုကောင်းပြီး 4x Zoom ထောက်ပံ့တဲ့ 48MP ကင်မရာ ၁ လုံး အပိုပါပါတယ်။ Google က Super Res Zoom ကြောင့် 20x အထိ ရနိုင်တယ်လို့ ပြောပါတယ်။ ဖုန်း ၂ လုံးစလုံးရဲ့ အနောက်ဘက်မှာ 50MP Main နဲ့ 12MP Ultrawide Angle ကင်မရာတွေ တပ်ဆင်ထားပြီး 50MP Sensor က 82 Degree Field of View ကို ထောက်ပံ့ပေးပါတယ်။ အရှေ့ ကင်မရာတွေအကြောင်းပြောရရင် 6 Pro မှာ 11.1MP နဲ့ 6 မှာ 8MP တွေ ထည့်သွင်းထားပါတယ်။
6 Pro မှာ ပိုကြီးတဲ့ 5,000mAh ဘက်ထရီနဲ့ 6 မှာ 4,600mAh ဘက်ထရီတွေ ထည့်သွင်းထားပြီး ၂ လုံးစလုံးမှာ 30W Wired Charging ထောက်ပံ့ထားပါတယ်။ Pixel Stand Charger နဲ့ အားသွင်းရင် 6 မှာ 21W နဲ့ 6 Pro မှာ 23W Wireless Charging ထောက်ပံ့နိုင်ပါတယ်။ ဘူးထဲမှာ Wired နဲ့ Wireless Charger မထည့်ပေးထားပါဘူး။
6 Pro မှာ အလူမီနီယမ် ဖရိမ်တပ်ဆင်ထားပြီး Cloudy White, Sorta Sunny, Stormy Black ၃ ရောင် ထုတ်လုပ်ထားပါတယ်။ 12/128GB , 12/256GB နဲ့ 12/512GB ၃ မျိုးထုတ်လုပ်ထားပြီး တန်ဖိုးအနည်းဆုံး မော်ဒယ်ကို ၈၉၉ ဒေါ်လာ သတ်မှတ်ထားကာ လက်ရှိပေါက်ဈေးအရ မြန်မာငွေ ၁၇ သိန်းလောက် ကျသင့်မှာပါ။
6 မှာ Textured အလူမီနီယမ် ဖရိမ် တပ်ဆင်ထားပြီး Sorta Seafoam, Kinda Coral, Stormy Black ၃ ရောင် ထုတ်လုပ်ထားပါတယ်။ 8/128GB နဲ့ 8/256GB ၂ မျိုး ထုတ်လုပ်ထားပြီး တန်ဖိုးအနည်းဆုံး မော်ဒယ်ကို ၅၉၉ ဒေါ်လာ သတ်မှတ်ထားကာ မြန်မာငွေ ၁၁ သိန်း ၃ သောင်းလောက် ကျသင့်မှာပါ။ ၂ လုံးစလုံးကို ကြိုတင်မှာယူနိုင်ပြီ ဖြစ်ပြီး ဒီလ ၂၈ ရက်နေ့ ရောင်းမှာပါ။
Ref : gsmarena
