Samsung ဟာ Galaxy Book 2 Go အမည်ရ လက်ပ်တော့ အသစ်ကို ကြေညာလိုက်ပြီး Qualcomm ရဲ့ လက်ပ်တော့ Processor ထည့်သွင်းထားပါတယ်။
Galaxy Book 2 Go ဟာ ပါးလွှာ ပေါ့ပါးပြီး ကျစ်လစ်တဲ့ ဒီဇိုင်းပါသလို စွမ်းရည် မြင့်မားပါတယ်။ Qualcomm ရဲ့ Snapdragon 7c+ Gen 3 Chipset အသစ် ထည့်သွင်းထားပြီး မူလ Galaxy Book Go မှာ ပါတဲ့ Snapdragon 7c Gen 2 နဲ့ ယှဉ်ရင် CPU စွမ်းရည်က ၄၀ ရာခိုင်နှုန်း GPU စွမ်းရည်က ၃၅ ရာခိုင်နှုန်း တိုးတက်လာပါတယ်။ Chipset အသစ်က WiFi 6E နဲ့ Bluetooth 5.2 တို့လို လုပ်ဆောင်ချက်တွေကို ထောက်ပံ့ထားပါတယ်။
ဒါ့အပြင် LPDDR4X RAM နဲ့ NVMe SSD Storage တွေကိုလည်း ထောက်ပံ့နိုင်ပါတယ်။ Qualcomm က Chip အသစ်ဟာ AI Processing ကို ပိုတိုးတက်စေတယ်လို့ ပြောပါတယ်။ Chip ကို 6nm Node နဲ့ TSMC က ထုတ်လုပ်ထားတာဖြစ်တဲ့အတွက် စွမ်းအင် စားသုံးမှု နည်းပါးပါတယ်။ Chipset က 5G ကို ထောက်ပံ့ပေမယ့် Samsung က WiFi Only မော်ဒယ်အတွက် Modem ကို Lock လုပ်ထားပါတယ်။ လက်ပ်တော့ရဲ့ တခြားလုပ်ဆောင်ချက်တွေထဲမှာ Galaxy Buds Auto Switch, Link To Windows, Multi Control, Quick Share, Samsung Notes နဲ့ Second Screen တို့ ပါပါတယ်။
Galaxy Book 2 Go မှာ ၁၄ လက်မ IPS LCD Full HD မျက်နှာပြင် တပ်ဆင်ထားပြီး ၁၈၀ ဒီဂရီ Hinge ပါပါတယ်။ အရွယ်ကြီး Trackpad နဲ့ Webcam တပ်ဆင်ထားပြီး Samsung က RAM , Storage နဲ့ ဘက်ထရီ ပမာဏကို မပြောသေးပါဘူး။ MIL-STD-810G နဲ့ တည်ဆောက်ထားတဲ့အတွက် အကြမ်းခံပြီး အလေးချိန်က ၁.၄၄ ကီလိုဂရမ်နဲ့ အထူက ၁၅.၅ မီလီမီတာ ရှိပါတယ်။ Galaxy Book 2 Go ကို ဒီလ ၂၀ ရက်နေ့ ပြင်သစ်မှာ Samsung တရားဝင် ဝက်ဘ်ဆိုက်ကနေ ရောင်းမှာပါ။
Ref : gizmochina
