ယူကေအခြေစိုက် နည်းပညာကုမ္ပဏီ Pulsar Fusion ဟာ နေမင်းရဲ့ စွမ်းအင်ကို အတုယူထားတဲ့ နျူကလီးယားပေါင်းစပ်မှု (nuclear fusion) စွမ်းအင်သုံး ဒုံးပျံတစ်မျိုးကို တီထွင်နေပါတယ်။ ‘Sunbird’ လို့ အမည်ပေးထားတဲ့ ဒီဒုံးပျံဟာ အာကာသခရီးသွားလာရေးကို တစ်ခေတ်ဆန်းစေမယ့် အဓိက အပြောင်းအလဲတစ်ခု ဖြစ်လာနိုင်ပါတယ်။
လက်ရှိ နည်းပညာတွေနဲ့ဆိုရင် အင်္ဂါဂြိုဟ်ကို သွားဖို့ ၇ လလောက် ကြာမြင့်နေပေမယ့် Sunbird ဒုံးပျံရဲ့ အမြင့်ဆုံးမြန်နှုန်း တစ်နာရီ မိုင် ၃၂၉,၀၀၀ (တစ်စက္ကန့်ကို မိုင် ၉၁.၃ မိုင်ခန့်) နဲ့ဆိုရင် ဒီခရီးစဉ်ကို ရက် ၃၀ အတွင်း အရောက်သွားနိုင်မှာ ဖြစ်ပါတယ်။ ဒါဟာ အာကာသခရီးစဉ်တွေကို သိသိသာသာ အချိန်တိုစေမယ့် မယုံနိုင်စရာ တိုးတက်မှုပါပဲ။
Sunbird ဘယ်လိုအလုပ်လုပ်လဲ?
Pulsar Fusion ရဲ့ Sunbird ဒုံးပျံဟာ Direct Fusion Drive (DFD) နည်းပညာကို အသုံးပြုထားပါတယ်။ ဒီနည်းပညာက နေမင်းမှာ စွမ်းအင်ထုတ်လုပ်တဲ့ ပုံစံအတိုင်း ဟိုက်ဒရိုဂျင်လို ပေါ့ပါးတဲ့ အက်တမ်တွေကို ပေါင်းစပ်ပြီး ကြီးမားတဲ့ စွမ်းအင်ပမာဏကို ထုတ်လုပ်တာ ဖြစ်ပါတယ်။ ဒီလို ထွက်ပေါ်လာတဲ့ စွမ်းအင်ကို ဒုံးပျံမောင်းနှင်ဖို့အတွက် တွန်းအားအဖြစ် အသုံးပြုတာပါ။ လက်ရှိ ဒုံးပျံတွေလို ဓာတုဗေဒလောင်စာတွေ မလိုအပ်ဘဲ အလွန်ကြီးမားတဲ့ တွန်းအားကို ထုတ်ပေးနိုင်တာက သူ့ရဲ့ အားသာချက်ပါပဲ။
အနာဂတ် စမ်းသပ်မှုနှင့် ကုန်ကျစရိတ်
Pulsar Fusion ဟာ သူတို့ရဲ့ DFD စနစ်ကို ၂၀၂၇ ခုနှစ်မှာ အာကာသထဲမှာ စမ်းသပ်ဖို့ စီစဉ်ထား ပါတယ်။ ဒီလို နည်းပညာအသစ်တွေမှာ ကုန်ကျစရိတ်က အမြဲမြင့်မားနေတတ်ပေမယ့် Sunbird တစ်စီးကို အမေရိကန်ဒေါ်လာ ၇၀ သန်း ခန့် ကုန်ကျနိုင်တယ်လို့ ခန့်မှန်းထားပါတယ်။
အာကာသနည်းပညာရဲ့ ကြီးမားတဲ့ ခြေလှမ်းသစ်
ကုန်ကျစရိတ် မြင့်မားပေမယ့် Sunbird ရဲ့ လျင်မြန်တဲ့ ခရီးသွားလာနိုင်စွမ်း၊ ပြန်လည်အသုံးပြုနိုင်တဲ့ စွမ်းရည် နဲ့ ကုန်စည်သယ်ယူပို့ဆောင်ရေး၊ ဥက္ကာခဲတူးဖော်ရေး နဲ့ နက်ရှိုင်းတဲ့ အာကာသမစ်ရှင်တွေ အတွက် အလားအလာတွေက အာကာသနည်းပညာနယ်ပယ်မှာ ကြီးမားတဲ့ တိုးတက်မှုကို ကိုယ်စားပြုပါတယ်။ ဒီဒုံးပျံဟာ အာကာသကို စူးစမ်းလေ့လာပုံနဲ့ ခရီးသွားလာပုံကို လုံးဝပြောင်းလဲပစ်နိုင်တဲ့ အလားအလာတွေ ရှိနေတာကြောင့် စောင့်ကြည့်ရမယ့် စီမံကိန်းတစ်ခု ဖြစ်ပါတယ်။
Sunbird ဒုံးပျံဟာ အင်္ဂါဂြိုဟ်ကို အချိန်တိုအတွင်း သွားနိုင်ရုံသာမက အနာဂတ်မှာ ပိုမိုဝေးကွာတဲ့ ဂြိုဟ်တွေဆီကိုပါ လူသားတွေ ရောက်ရှိဖို့ လမ်းဖွင့်ပေးနိုင်မလားဆိုတာ စိတ်ဝင်စားစရာပါပဲ။
Ref : Tech Explorers
