Apple က နောက်ဆုံးပေါ် iPhone အသစ်တွေကို မကြာခင်ကမိတ်ဆက်လိုက်ပါပြီ။ လူအများစုကတော့ အဲဒီဖုန်းတစ်လုံးရဖို့ ပိုက်ဆံစုရမှာဖြစ်ပေမယ့်၊ တရုတ်မီဒီယာကုမ္ပဏီ Mediastorm က ဝန်ထမ်းတွေကတော့ စိတ်ပူစရာ မလိုပါဘူး။
သူတို့ရဲ့ CEO ဖြစ်တဲ့ Tim Pan က ဝန်ထမ်းတိုင်းကို အမြင့်ဆုံးမော်ဒယ်ဖြစ်တဲ့ iPhone 17 Pro Max တစ်လုံးစီ လက်ဆောင်ပေးမယ့်အကြောင်း မကြာသေးခင်က ကြေညာခဲ့ပါတယ်။
ကယ်လီဖိုးနီးယားက Steve Jobs ပြဇာတ်ရုံမှာ ပြုလုပ်တဲ့ Apple ရဲ့ မိတ်ဆက်ပွဲကို တက်ရောက်ခဲ့တဲ့ ဝန်ထမ်းမလေးတစ်ဦးက၊ keynote (အဓိက မိတ်ဆက်ပွဲ) ပြီးဆုံးသွားချိန်မှာပဲ “ဒီနှစ်ရဲ့ အကောင်းဆုံးသတင်း” ထွက်ပေါ်လာတယ်လို့ Xiaohongshu မှာ မျှဝေခဲ့ပါတယ်။ “မစ္စတာတင်မ်ဟာ တကယ်ပဲ ကမ္ဘာပေါ်မှာ အကောင်းဆုံး သူဌေးပါပဲ!” လို့ သူမက ရေးသားခဲ့ပါတယ်။
မစ္စတာပန်ရဲ့ မက်ဆေ့ချ်ထဲမှာ၊ ကြေညာချက်ထုတ်ပြန်တဲ့အချိန် ကုမ္ပဏီမှာ ရှိနေသမျှ ဝန်ထမ်းအားလုံးကို (အလုပ်သင်တွေကနေ ဝန်ထမ်းသစ်စက်စက်တွေအထိ) ဒီ ရက်ရောတဲ့ လက်ဆောင် အစီအစဉ်က အကျုံးဝင်တယ်လို့ အတည်ပြုထားပါတယ်။
ဝန်ထမ်းတစ်ဦးစီဟာ (စင်ကာပူဈေး S$1,899 ကစတဲ့) iPhone 17 Pro Max တစ်လုံးစီ ရရှိမှာဖြစ်ပြီး၊ သူတို့ကြိုက်နှစ်သက်ရင် တခြားမော်ဒယ်ကို ရွေးချယ်ခွင့်လည်း ရှိပါတယ်။ တရုတ်နိုင်ငံမှာ လက်ဆောင်ပစ္စည်းတွေက အခွန်ဆောင်ရတာကြောင့်၊ အဲဒီကုန်ကျစရိတ်တွေကိုလည်း Mediastorm ဘက်က ကျခံပေးသွားမှာဖြစ်တယ်လို့ မစ္စတာပန်က ဝန်ထမ်းတွေကို ပြောခဲ့ပါတယ်။
ဒါဟာ CEO က သူ့ဝန်ထမ်းတွေကို Apple ထုတ်ကုန်တွေနဲ့ အံ့အားသင့်စေခဲ့တာ ပထမဆုံးအကြိမ်တော့ မဟုတ်ဘဲ၊ နှစ်စဉ်ပြုလုပ်နေကျ ရက်ရောတဲ့ အစဉ်အလာတစ်ခု ဖြစ်ပါတယ်။
၂၀၂၄ ခုနှစ်တုန်းကလည်း Mediastorm ဝန်ထမ်း ၁၀၀ လောက်ဟာ iPhone 16 Pro တစ်လုံးစီနဲ့ Apple Watch Series 10 တစ်လုံးစီကို လက်ဆောင် ရရှိခဲ့ကြပါတယ်။
ဒီနှစ်ရဲ့ လက်ဆောင် အစီအစဉ်မှာလိုပဲ၊ အဲဒီအခါကလည်း သက်ဆိုင်ရာ အခွန်အားလုံးကို ကုမ္ပဏီကပဲ ပေးဆောင်ခဲ့ပါတယ်။
Ref : mustsharenews
