တရုတ်နိုင်ငံ Shenzhen မှာ ရဲတပ်ဖွဲ့ဝင်တွေနဲ့အတူ လမ်းလျှောက်နေတဲ့ humanoid စက်ရုပ်တစ်ရုပ်ကို တွေ့ရှိခဲ့ရပါတယ်။ T800 လို့ခေါ်တဲ့ လူအရွယ်အစားရှိ ဒီစက်ရုပ်ဟာ Window of the World လို့ခေါ်တဲ့ နာမည်ကြီး ခရီးသွား နေရာမှာ ရဲအရာရှိတွေရဲ့ ရှေ့ကနေ ယုံကြည်မှုရှိရှိ လမ်းလျှောက်နေတာကို တွေ့ခဲ့ရတာပါ။ တာဝန်ရှိသူတွေကတော့ ဒါဟာ သရုပ်ပြပွဲသက်သက်သာဖြစ်ပြီး ပုံမှန် ရဲလုပ်ငန်းစဉ်ရဲ့ အစိတ်အပိုင်း မဟုတ်ဘူးလို့ ပြောပါတယ်။
EngineAI Robotics က တည်ဆောက်ထားတဲ့ T800 ဟာ အရပ် ၅ ပေ ၈ လက်မ (၁.၇၃ မီတာ) ရှိပြီး ပေါင် ၁၆၅ (၇၅ ကီလိုဂရမ်) လေးပါတယ်။ သူက ကန်နိုင်၊ ခုန်နိုင်ပြီး လျင်မြန်စွာ ရွေ့လျားနိုင်ပါတယ်။ အာရုံခံကိရိယာတွေ တပ်ဆင်ထားတဲ့ လက်တွေက အရာဝတ္ထုတွေကို တိတိကျကျ ကိုင်တွယ်နိုင်စေပါတယ်။
ဒီစက်ရုပ်ကို စက်ရုံတွေ၊ ဝန်ဆောင်မှုလုပ်ငန်းတွေနဲ့ လုံခြုံရေးတာဝန်တွေအတွက် ဒီဇိုင်းထုတ်ထားတာပါ။ AI စနစ်နဲ့ မောင်းနှင်ပြီး အချို့မော်ဒယ်တွေမှာ Nvidia ပရိုဆက်ဆာတွေကို အသုံးပြုထားပါတယ်။ တစ်နာရီကို ၆.၇ မိုင် (၁၀.၈ ကီလိုမီတာ) နှုန်းနဲ့ လမ်းလျှောက်နိုင်ပြီး အားတစ်ခါသွင်းထားရင် ၄ နာရီကနေ ၅ နာရီအထိ အသုံးခံပါတယ်။ အခြေခံ မော်ဒယ်တွေကတော့ ဒေါ်လာ ၂၅,၀၀၀ ဝန်းကျင်ကနေ စတင်ပါတယ်။
Shenzhen က ကင်းလှည့်မှုဟာ စမ်းသပ်မှုတစ်ခုသာ ဖြစ်ပေမယ့် ဒီဗီဒီယိုဖိုင်က humanoid စက်ရုပ်တွေ လူထုကြားထဲကို ဘယ်လို စတင်ရောက်ရှိလာပြီလဲဆိုတာ မီးမောင်းထိုးပြနေသလို လူသား ရဲအရာရှိတွေနဲ့အတူ သူတို့ရဲ့ အနာဂတ် အခန်းကဏ္ဍနဲ့ ပတ်သက်ပြီး မေးခွန်းထုတ်စရာတွေလည်း ဖြစ်ပေါ်စေပါတယ်။
Ref : Technology Innovation
