၂၀၀၈ ခုနှစ် Apple App Store စတင်ခေတ်စားလာချိန်မှာ Steve Sheraton ဆိုသူဟာ သူ့ရဲ့ ဖန်တီးနိုင်စွမ်းကို အသုံးပြုပြီး iBeer ဆိုတဲ့ Application တစ်ခုကို မိတ်ဆက်ခဲ့ပါတယ်။ အဲဒီ App ဟာ iPhone မျက်နှာပြင်ပေါ်မှာ ဘီယာသောက်နေရသလို ခံစားရစေတဲ့ ဆန်းသစ်တီထွင်မှုတစ်ခု ဖြစ်ပြီး မိုဘိုင်း App သမိုင်းမှာ အအောင်မြင်ဆုံး မှတ်တိုင်တစ်ခု ဖြစ်လာခဲ့ပါတယ်။
ဒေါ်လာ ၂.၉၉ သတ်မှတ်ထားတဲ့ iBeer ဟာ ကမ္ဘာတစ်ဝန်းမှာ လူကြိုက်များခဲ့ပြီး မိတ္တူသန်းပေါင်းများစွာ ရောင်းချခဲ့ရပါတယ်။ ရောင်းအားအကောင်းဆုံး အချိန်တွေမှာဆိုရင် တစ်ရက်ကို ဒေါ်လာ ၁၀,၀၀၀ ကနေ ၂၀,၀၀၀ အထိ ဝင်ငွေရရှိခဲ့ပြီး Steve Sheraton ကို သာမန်မျက်လှည့်ဆရာဘဝကနေ ဒေါ်လာသန်းချီ ချမ်းသာတဲ့ သူဌေးတစ်ဦးအဖြစ် ရောက်ရှိစေခဲ့ပါတယ်။
ဖုန်းကို စောင်းလိုက်တာနဲ့ ဘီယာကုန်သွားပြီး အမြှုပ်တွေကျန်ခဲ့တဲ့ ပုံစံမျိုးကို iPhone ရဲ့ လှုပ်ရှားမှုအာရုံခံစနစ်နဲ့ ပေါင်းစပ်ဖန်တီးထားတာ ဖြစ်ပါတယ်။ ဒီရိုးရှင်းပေမယ့် ပြောင်မြောက်တဲ့ အိုင်ဒီယာဟာ ကမ္ဘာအနှံ့က ပါတီပွဲတွေမှာ ရေပန်းစားခဲ့ပြီး နည်းပညာနဲ့ ဖျော်ဖြေရေးကို အကောင်းဆုံး ပေါင်းစပ်ပြနိုင်ခဲ့တာကြောင့် ငွေတွင်းကြီးတစ်ခုသဖွယ် အကျိုးအမြတ်တွေ သယ်ဆောင်လာပေးခဲ့ပါတယ်။
iBeer ရဲ့ အောင်မြင်မှုက ရိုးရှင်းတဲ့ အိုင်ဒီယာတစ်ခုနဲ့တင် ဘဝပြောင်းလဲသွားနိုင်တယ်ဆိုတာကို သက်သေပြခဲ့ပါတယ်။ အခုချိန်မှာတော့ Steve Sheraton ဟာ စပိန် နိုင်ငံမှာ သူဝါသနာပါရာတွေကို ဆက်လက်လုပ်ကိုင်ရင်း အောင်မြင်မှုရဲ့ ရလဒ်တွေကို စိတ်ချမ်းမြေ့စွာ ခံစားနေထိုင်လျက် ရှိပါတယ်။
ref : yourstory
