အမေရိကန်က ဟော့ပေါ့ဆိုင်မှာ ထိန်းမနိုင်သိမ်းမရ ကနေခဲ့တဲ့ စက်ရုပ်

ကယ်လီဖိုးနီးယားပြည်နယ်မှာရှိတဲ့ တရုတ် ဟော့ပေါ့ဆိုင်ခွဲ Haidilao က စက်ရုပ်တစ်ရုပ်ဟာ နည်းပညာချို့ယွင်းမှုကြောင့် ထိန်းမနိုင်သိမ်းမရ ကနေခဲ့တဲ့အတွက် လူမှုကွန်ရက်မှာ ရေပန်းစားသွားခဲ့ပါတယ်။ အဲဒီ ဟော့ပေါ့ဆိုင်ဟာ နည်းပညာနဲ့ စက်ရုပ်တွေ အသုံးပြုပြီး ဝန်ဆောင်မှုပေးတဲ့နေရာမှာ နာမည်ကြီးပြီး အခုလို ကနေတဲ့ စက်ရုပ်ဟာ ဝန်ထမ်းတွေကို ကူညီပေးဖို့နဲ့ ဖောက်သည်တွေကို ဖျော်ဖြေပေးဖို့ ဖန်တီးထားတာ ဖြစ်ပါတယ်။

အွန်လိုင်းမှာ ပျံ့နှံ့နေတဲ့ ဗီဒီယိုထဲမှာတော့ အဲဒီ စက်ရုပ်ဟာ ဆိုင်ထဲမှာ လျှောက်သွားပြီး အဆက်မပြတ် ကနေခဲ့တာကို မြင်တွေ့ရပါတယ်။ စက်ရုပ်ဟာ ခိုင်းစေချက်တွေကို မနာခံဘဲ ဆက်တိုက် လှုပ်ရှားနေခဲ့တာဖြစ်ပြီး ဆိုင်ထဲက ဖောက်သည်တွေကလည်း အံ့ဩတကြီး ကြည့်ရှုကာ ဖုန်းတွေနဲ့ မှတ်တမ်းတင်ခဲ့ကြပါတယ်။

အဲဒီနောက်မှာတော့ ဝန်ထမ်း ၃ ဦးက အခြေအနေကို ထိန်းသိမ်းဖို့ ဝင်ရောက်လာခဲ့ပြီး ဘယ်သူမှ ထိခိုက်ဒဏ်ရာ မရစေဖို့အတွက် စက်ရုပ်ကို သတိထားပြီး တားဆီးခဲ့ရပါတယ်။ ဒီဖြစ်စဉ်မှာ လူတွေ ထိခိုက်ဒဏ်ရာရတာမျိုး မရှိခဲ့ပေမယ့် လူစည်ကားတဲ့ နေရာတွေမှာ အသုံးပြုနေတဲ့ ဝန်ဆောင်မှုပေး စက်ရုပ်တွေရဲ့ ယုံကြည်စိတ်ချရမှုအပေါ် မေးခွန်းထုတ်စရာတွေ ဖြစ်လာခဲ့ပါတယ်။

Haidilao ဟာ စက်ရုပ်တွေ၊ အဆင့်မြင့်စနစ်တွေ အသုံးပြုပြီး ထူးခြားတဲ့ စားသောက်မှုအတွေ့အကြုံကို ပေးစွမ်းနိုင်တဲ့အတွက် ကမ္ဘာတစ်ဝန်းမှာ နာမည်ကြီးပါတယ်။ အခုလို ဖြစ်ရပ်ကြောင့် ခေတ်မီနည်းပညာတွေဟာ တစ်ခါတလေမှာ မထင်မှတ်ထားတဲ့ ချို့ယွင်းမှုတွေ ဖြစ်နိုင်တယ်ဆိုတာကို ပြသနေပြီး ကုမ္ပဏီဘက်ကတော့ ဒီကိစ္စနဲ့ပတ်သက်လို့ အသေးစိတ် ထုတ်ပြန်ထားတာ မရှိသေးပါဘူး။

Ref : ndtv