တရုတ်နိုင်ငံ ရှန်ကျန်းမြို့မှာရှိတဲ့ အမျိုးသား စူပါကွန်ပျူတာ စင်တာက လိုင်းရှိုင်း (LineShine) စူပါကွန်ပျူတာဟာ ကမ္ဘာ့အစွမ်းထက်ဆုံး စူပါကွန်ပျူတာ စာရင်းမှာ ပထမနေရာကို ရရှိသွားပါတယ်။
ဒါဟာ ၂၀၁၇ ခုနှစ်နောက်ပိုင်း တရုတ်နိုင်ငံအနေနဲ့ အမေရိကန်ကို ပထမဆုံးအကြိမ် ပြန်လည်ကျော်တက်နိုင်ခဲ့တာ ဖြစ်ပြီး အရင်က ပထမရထားတဲ့ အမေရိကန်ရဲ့ အယ်လ် ကာပီတန် (El Capitan) စူပါကွန်ပျူတာထက် တွက်ချက်မှုနှုန်း ၂၀ ရာခိုင်နှုန်း ပိုမိုမြန်ဆန်တယ်လို့ သိရပါတယ်။
စူပါကွန်ပျူတာတွေဟာ ဆေးဝါးအသစ်တွေ ရှာဖွေဖော်ထုတ်တာ၊ ရာသီဥတု ခန့်မှန်းတာနဲ့ AI မော်ဒယ်တွေကို လေ့ကျင့်ပေးတာ စတဲ့ ရှုပ်ထွေးတဲ့ တွက်ချက်မှုတွေမှာ အသုံးပြုရတဲ့ ကွန်ပျူတာတွေ ဖြစ်ပါတယ်။
အဲဒီ လိုင်းရှိုင်း စူပါကွန်ပျူတာဟာ အမေရိကန်ရဲ့ နည်းပညာ ပိတ်ဆို့ကန့်သတ်မှုတွေကို ကျော်လွှားပြီး တရုတ်နိုင်ငံတွင်းမှာပဲ ကိုယ်တိုင်ထုတ်လုပ်ထားတဲ့ ချစ်ပ် (Chip) တွေကို အသုံးပြုထားတာ ဖြစ်ပါတယ်။
အခုခေတ် စူပါကွန်ပျူတာ အများစုမှာ အမေရိကန်ရဲ့ အင်ဗီးဒီးယား (Nvidia) လို ကုမ္ပဏီတွေက ထုတ်တဲ့ ဂျီပီယူ (GPU) ချစ်ပ်တွေကို သုံးကြပေမယ့် လိုင်းရှိုင်းကတော့ တရုတ်နိုင်ငံက ကိုယ်တိုင်တီထွင်ထားတဲ့ စီပီယူ (CPU) တွေနဲ့ ဟိုက်ဘန်းဝစ် မန်မိုရီ (HBM) နည်းပညာတွေကိုပဲ အပြည့်အဝ အသုံးပြုထားပါတယ်။
ဒါဟာ ပြည်ပနည်းပညာ အမှီအခိုကင်းတဲ့ ဟာ့ဒ်ဝဲနဲ့ ဆော့ဖ်ဝဲ ဂေဟစနစ်တစ်ခုကို တည်ဆောက်နိုင်ခဲ့တဲ့ သမိုင်းဝင် ခြေလှမ်းတစ်ခုလည်း ဖြစ်ပါတယ်။
ဒါပေမယ့် နည်းပညာ ကျွမ်းကျင်သူတွေကတော့ အခု စာရင်းဟာ နိုင်ငံတစ်ခုရဲ့ AI စွမ်းဆောင်ရည်ကို တိုင်းတာဖို့အတွက် အကောင်းဆုံး စံနှုန်းတစ်ခုတော့ မဟုတ်သေးဘူးလို့ သတိပေးထားပါတယ်။
ဘာလို့လဲဆိုတော့ အခု TOP500 စာရင်းဟာ ရိုးရာသိပ္ပံပညာဆိုင်ရာ တွက်ချက်မှုတွေကိုပဲ အဓိက တိုင်းတာတာ ဖြစ်ပြီး အမေရိကန်ရဲ့ ဂူဂဲလ် (Google) နဲ့ xAI တို့လို ကုမ္ပဏီကြီးတွေ တည်ဆောက်ထားတဲ့ အစွမ်းထက်ဆုံး AI စနစ်အများစုဟာ လုံခြုံရေးနဲ့ စီးပွားရေး အကြောင်းပြချက်တွေကြောင့် အဲဒီစာရင်းထဲမှာ ပါဝင်ခြင်း မရှိလို့ ဖြစ်ပါတယ်။
ဒါပေမယ့်လည်း အခုအောင်မြင်မှုဟာ တရုတ်နိုင်ငံရဲ့ နည်းပညာကဏ္ဍအတွက် အလွန်အထင်ကြီးစရာကောင်းတဲ့ တိုးတက်မှုတစ်ခု ဖြစ်တယ်ဆိုတာ ငြင်းလို့မရပါဘူး။
Ref: cnn
