Google ဟာ မြို့ပြတွေမှာ ဖြစ်ပွားတတ်တဲ့ အန္တရာယ်ရှိတဲ့ ရုတ်တရက်ရေကြီးမှုတွေကို မဖြစ်ပွားခင် ၂၄ နာရီအထိ ကြိုတင်ခန့်မှန်းပေးနိုင်တဲ့ ဉာဏ်ရည်တု (AI) စနစ်အသစ်တစ်ခုကို မိတ်ဆက်လိုက်ပါတယ်။ “Ground Source” လို့ အမည်ပေးထားတဲ့ အဲဒီစနစ်ဟာ Google ရဲ့ Gemini AI ကို အခြေခံထားပြီး နိုင်ငံပေါင်း ၁၅၀ ကျော်က ပြီးခဲ့တဲ့ ရေကြီးမှုဖြစ်စဉ်ပေါင်း ၂.၆ သန်းကျော်ကို အသုံးပြုပြီး လေ့ကျင့်ပေးထားတာ ဖြစ်ပါတယ်။ အဲဒီစနစ်က လူတွေအနေနဲ့ ကြိုတင်ပြင်ဆင်ဖို့နဲ့ ဘေးကင်းလုံခြုံစွာ နေထိုင်နိုင်ဖို့အတွက် အချိန်ပိုရစေမှာ ဖြစ်ပါတယ်။
အဲဒီ AI စနစ်ဟာ ရေကြီးမှုကို စောင့်ကြည့်တဲ့ စနစ်ကောင်းကောင်းမရှိတဲ့ နေရာတွေမှာပါ ရုတ်တရက်ရေကြီးနိုင်မယ့် အခြေအနေတွေကို ခန့်မှန်းပေးနိုင်ပါတယ်။ အဲဒီလို ခန့်မှန်းနိုင်ဖို့အတွက် မိုးလေဝသခန့်မှန်းချက်တွေ၊ ဂြိုဟ်တုဓာတ်ပုံတွေ၊ မြစ်ချောင်းဆိုင်ရာ အချက်အလက်တွေ၊ မြေပုံတွေနဲ့ အရင်ကဖြစ်ပွားခဲ့တဲ့ ရေကြီးမှုအခြေအနေတွေကို လေ့လာဆန်းစစ်တာ ဖြစ်ပါတယ်။ ဒေသတွင်း အာရုံခံကိရိယာတွေနဲ့ စက်ပစ္စည်းတွေအပေါ်မှာပဲ မှီခိုနေရတဲ့ ရိုးရာရေကြီးမှု ခန့်မှန်းချက်တွေနဲ့မတူဘဲ Google ရဲ့ AI က အများပြည်သူဆိုင်ရာ အချက်အလက်တွေနဲ့ စက်ပစ္စည်းလေ့လာသင်ယူမှု (machine learning) ကို အသုံးပြုပြီး ခန့်မှန်းပေးတာ ဖြစ်ပါတယ်။ ဒါ့အပြင် အဲဒီစနစ်ကို လက်ရှိမိုးလေဝသစနစ်တွေနဲ့ အစားထိုးဖို့ မဟုတ်ဘဲ ပူးတွဲလုပ်ဆောင်နိုင်ဖို့ ပုံစံထုတ်ထားတာ ဖြစ်ပါတယ်။
Google ဟာ အဲဒီခန့်မှန်းချက်တွေကို နိုင်ငံအများအပြားမှာ ရေကြီးမှုသတိပေးချက်တွေနဲ့ မြေပုံတွေကို ပြသပေးနေတဲ့ “Flood Hub” ဆိုတဲ့ အခမဲ့ပလက်ဖောင်းကနေတစ်ဆင့် ဖြန့်ဝေပေးနေပါတယ်။ အဲဒီလို လုပ်ဆောင်ပေးရတဲ့ ရည်ရွယ်ချက်ကတော့ အရေးပေါ်ကယ်ဆယ်ရေးအဖွဲ့တွေ၊ အစိုးရတွေနဲ့ ပြည်သူတွေ ရေမကြီးခင် ကြိုတင်လုပ်ဆောင်နိုင်ဖို့ ကူညီပေးဖို့ ဖြစ်ပါတယ်။ ရုတ်တရက်ရေကြီးမှုတွေဟာ အချိန်တိုအတွင်းမှာ ဖြစ်ပွားတတ်ပြီး နှစ်စဉ်နှစ်တိုင်း ပျက်စီးဆုံးရှုံးမှုတွေ အများကြီးဖြစ်စေတဲ့အတွက် အခုလို ကြိုတင်သတိပေးချက်တွေ ရရှိတာက အသက်ပေါင်းများစွာကို ကယ်တင်နိုင်မယ့်အပြင် ပျက်စီးဆုံးရှုံးမှုတွေကိုလည်း လျှော့ချပေးနိုင်မှာ ဖြစ်ပါတယ်။
Ref : Technology Innovation
