စိတ်နဲ့ စက်ရုပ်တွေကို ထိန်းချုပ်နိုင်မယ့် နည်းပညာကို တရုတ်မှာ မိတ်ဆက်

တရုတ် ဦးနှောက်နဲ့ ကွန်ပျူတာ ချိတ်ဆက်နည်းပညာ (BCI) ကုမ္ပဏီတစ်ခုဖြစ်တဲ့ BrainCo ဟာ စိတ်ကူးရုံနဲ့တင် စက်ရုပ်တွေကို ထိန်းချုပ်နိုင်မယ့် စနစ်သစ်တစ်ခုကို မိတ်ဆက်လိုက်ပါတယ်။ အဲဒီ နည်းပညာကို ရှန်ဟိုင်းမှာ ကျင်းပခဲ့တဲ့ ၂၀၂၆ ကမ္ဘာ့အတုအယောင်ဉာဏ်ရည် ကွန်ဖရင့် (WAIC) မှာ ပြသခဲ့တာဖြစ်ပါတယ်။

အဲဒီ စနစ်ဟာ ခေါင်းမှာ စွပ်ရတဲ့ အာရုံခံစက် (EEG headset) ကို အသုံးပြုထားတာမို့ ခွဲစိတ်မှု သို့မဟုတ် ဦးနှောက်ထဲ ပစ္စည်းထည့်သွင်းဖို့ မလိုအပ်ပါဘူး။ အဲဒီ စက်က ဦးနှောက်က လှိုင်းတွေကို ဖတ်ယူပြီး AI နည်းပညာနဲ့ စက်ရုပ်ဆီ စေခိုင်းချက်တွေအဖြစ် ပြောင်းလဲပေးတာ ဖြစ်ပါတယ်။ အဲဒီ လုပ်ဆောင်ချက်ဟာ မိလီစက္ကန့် ၂၀၀ အောက်ပဲ ကြာတာကြောင့် စက်ရုပ်တွေက ချက်ချင်းဆိုသလို တုံ့ပြန်နိုင်ပါတယ်။ တိုက်ရိုက် ပြသမှုမှာ အသုံးပြုသူတွေဟာ စိတ်ထဲကပဲ တွေးလိုက်ရုံနဲ့ စက်ရုပ်လက်တံကို ထိန်းချုပ်ပြသွားခဲ့ပြီး လူတူစက်ရုပ်တွေ၊ စက်ရုပ်ခွေးတွေနဲ့ တခြား စက်ရုပ်စနစ်တွေမှာပါ အသုံးပြုနိုင်မှာဖြစ်တယ်လို့ ဆိုပါတယ်။ Developer တွေအနေနဲ့လည်း ၎င်းတို့ရဲ့ ဆော့ဖ်ဝဲလ်ကနေတစ်ဆင့် သဟဇာတဖြစ်တဲ့ စက်ရုပ်တွေကို ၁၀ မိနစ်အတွင်း ချိတ်ဆက်နိုင်မယ်လို့ BrainCo က ပြောပါတယ်။

အဲဒီ နည်းပညာဟာ ကျန်းမာရေး၊ ထုတ်လုပ်ရေး၊ သုတေသနနဲ့ ကုန်စည်ပို့ဆောင်ရေး ကဏ္ဍတွေအတွက် AI စနစ်သုံး စက်ရုပ်တွေ ထုတ်လုပ်မှုကို ပိုမို လျှင်မြန်စေမှာဖြစ်ပြီး ထိန်းချုပ်ရတာကိုလည်း ပိုမို လွယ်ကူစေမယ်လို့ BrainCo က ယူဆထားပါတယ်။ လက်ရှိမှာတော့ အဲဒီ ပလက်ဖောင်းဟာ သုတေသနအဆင့်မှာပဲ ရှိသေးတာကြောင့် သာမန်သုံးစွဲသူတွေ ဝယ်ယူနိုင်ဦးမှာ မဟုတ်ပါဘူး။ BrainCo က ဒါကို ကမ္ဘာ့ပထမဆုံး ဦးနှောက်နဲ့ စက်ရုပ် တိုက်ရိုက်ချိတ်ဆက်တဲ့ AI R&D ပလက်ဖောင်းလို့ တင်စားထားပေမယ့် လွတ်လပ်တဲ့ သုတေသနအဖွဲ့အစည်းတွေဘက်ကတော့ သီးခြား အတည်ပြုထားတာမျိုး မရှိသေးပါဘူး။

Ref : Technology Innovation