လူတူစက်ရုပ်တွေနဲ့ ကားထုတ်လုပ်မည်

တရုတ် အခြေစိုက် Dongfeng Motor ကုမ္ပဏီက ကားထုတ်လုပ်တဲ့ စက်ရုံမှာ Ubtech Robotics ရဲ့ လူတူစက်ရုပ်တွေကို အသုံးပြုဖို့ သဘောတူညီမှုရခဲ့ပါတယ်။

Ubtech ရဲ့ Walker S လူတူစက်ရုပ်ဟာ Dongfeng Motor ရဲ့ ကားထုတ်လုပ်တဲ့ စက်ရုံမှာ အလုပ်များစွာကို ပြုလုပ်ပေးမှာပါ။ အဲဒီအလုပ်တွေထဲမှာ ထိုင်ခုံခါးပတ်၊ တံခါး Lock ၊ ရှေ့မီး ကာဗာ ၊ ကားကိုယ်ထည် အရည်အသွေး၊ အနောက် ကာဗာနဲ့အတွင်းပိုင်းကို စစ်ဆေးတာ ပါဝင်ပါတယ်။ ဒါ့အပြင် စက်ရုပ်တွေဟာ ဆီဖြည့်တာ၊ ကား အစိတ်အပိုင်းတွေ တပ်ဆင်တာ၊ ပစ္စည်းတွေ သယ်ယူပို့ဆောင်ပေးတာ၊ လိုဂို တပ်ဆင်တာနဲ့ Label Print ထုတ်တာ စတဲ့ အလုပ်တွေကိုလည်း လုပ်ပေးမှာပါ။

Dongfeng Motor ရဲ့ အထွေထွေ မန်နေဂျာ Lin Changbo က Ubtech ရဲ့ လူတူစက်ရုပ်မှာ နောက်ဆုံးပေါ် AI နည်းပညာ ထည့်သွင်းထားတယ်လို့ ပြောပါတယ်။ စက်ရုပ်တွေကို လေ့ကျင့်ပေးလိုက်ရင် ကားကို စစ်ဆေးတာနဲ့ ကားအစိတ်အပိုင်း တပ်ဆင်တာတွေကို လူသားတွေထက် ပိုကောင်းအောင် ပြုလုပ်နိုင်မယ်လို့ ယုံကြည်ထားကြပါတယ်။ ဒါ့အပြင် ကားထုတ်လုပ်တဲ့ နယ်ပယ်မှာ ဉာဏ်ရည်မြင့် AI နည်းပညာကို အသုံးချလာနိုင်မှာပါ။

Ubtech က Walker S လူတူစက်ရုပ်ဟာ အရပ် ၁.၇ မီတာ မြင့်မားပြီး Fusion Control Algorithm တွေ ထည့်သွင်းထားတယ်လို့ ပြောပါတယ်။ စက်ရုပ်ဟာ စက်ရုံရဲ့ System နဲ့ ဆက်သွယ်နိုင်ကာ အလုပ်တွေ လုပ်ပေးနိုင်ပြီး သတင်းအချက်အလက်တွေကို အချိန်နဲ့ တစ်ပြေးညီ သတင်းပို့နိုင်ပါတယ်။

Ref : gizmochina