ဟက်ကာတွေဟာ အရင်က ဘယ်သူမှ မသိသေးတဲ့ ဆော့ဖ်ဝဲလ် အားနည်းချက် (Bug) တွေကို ရှာဖွေဖို့ AI နည်းပညာကို လက်နက်သဖွယ် စတင်အသုံးပြုနေပြီ ဖြစ်ပါတယ်။ Google ရဲ့ မေလ ၁၁ ရက်နေ့ထုတ် အစီရင်ခံစာအရ ရာဇဝတ်ဂိုဏ်းတစ်ခုဟာ AI မော်ဒယ်ကို အသုံးချပြီး ဆိုင်ဘာတိုက်ခိုက်မှုကြီးတစ်ခု ပြုလုပ်ဖို့ ကြိုးပမ်းခဲ့တာကို တွေ့ရှိခဲ့ရပါတယ်။ အန္တရာယ်ရှိတဲ့ ဟက်ကာတွေက AI ကို သုံးပြီး ရှာရခက်တဲ့ ကွန်ပျူတာကုဒ် အမှားတွေကို ဖော်ထုတ်တိုက်ခိုက်လာနိုင်တယ်ဆိုတဲ့ စိုးရိမ်မှုတွေဟာ အရင်က သီအိုရီအရပဲ ရှိခဲ့ပေမဲ့ အခုတော့ ဒါဟာ တကယ့်လက်တွေ့ ခြိမ်းခြောက်မှုကြီး ဖြစ်လာနေပါပြီ။
ဒီတိုက်ခိုက်မှုဟာ ဘယ်သူ့ကို ပစ်မှတ်ထားတာလဲ ဒါမှမဟုတ် ဘယ် AI ပလပ်ဖောင်းကို သုံးခဲ့တာလဲဆိုတာကို Google က အတိအကျ မပြောထားပေမဲ့ သူတို့ရဲ့ Gemini Chatbot ကို သုံးခဲ့တာတော့ မဟုတ်ဘူးလို့ ဆိုပါတယ်။ အခုလို ဆော့ဖ်ဝဲလ် ထုတ်လုပ်သူတွေတောင် မသိသေးတဲ့ “Zero-day vulnerabilities” လို့ခေါ်တဲ့ လုံခြုံရေး ဟာကွက်တွေကို AI နဲ့ အလွယ်တကူ ရှာဖွေလာနိုင်တာဟာ နည်းပညာလောကအတွက် အင်မတန် အန္တရာယ်များတဲ့ အခြေအနေပဲ ဖြစ်ပါတယ်။ အရင်ကဆိုရင် ဒီလို ဟာကွက်မျိုးတွေဟာ ဟက်ကာတွေရဲ့ မှောင်ခိုဈေးကွက်မှာ ဒေါ်လာသန်းနဲ့ချီ တန်ဖိုးရှိခဲ့တာပါ။
အခုလို AI ကို အသုံးချတဲ့ ဆိုင်ဘာတိုက်ခိုက်မှုတွေ ပေါ်ပေါက်လာတာကြောင့် အစိုးရတွေနဲ့ နည်းပညာ ကုမ္ပဏီကြီးတွေဟာ AI နည်းပညာကို ဘယ်လိုမျိုး ထိန်းကျောင်းကြမလဲဆိုတာ အလေးအနက် ပြန်လည်သုံးသပ်နေကြပါတယ်။ အထူးသဖြင့် AI ရဲ့ အဆင့်မြင့်ဗားရှင်းတွေဟာ ဆိုင်ဘာလုံခြုံရေးအပေါ်မှာ ဘယ်လောက်အထိ သက်ရောက်မှုရှိနိုင်မလဲဆိုတာကို စိုးရိမ်နေကြတာ ဖြစ်ပါတယ်။ ဒီဖြစ်ရပ်ဟာ AI နည်းပညာ တိုးတက်လာတာနဲ့အမျှ ဒစ်ဂျစ်တယ်လုံခြုံရေးအတွက် စိန်ခေါ်မှုအသစ်တွေ ပိုများလာမယ့် သဘောပဲ ဖြစ်ပါတယ်။
Ref : The New York Times
