နယူးယောက်မြို့ရဲ့ ကားပိတ်လှတဲ့ လမ်းမတွေကို ကျော်ဖြတ်ပြီး မန်ဟက်တန်ကနေ ဂျွန်အက်ဖ်ကနေဒီ (JFK) လေဆိပ်ကို ၁၀ မိနစ်အတွင်း ရောက်ရှိစေမယ့် “လျှပ်စစ်တက္ကစီလေယာဉ်” ကို Joby Aviation ကုမ္ပဏီက အောင်မြင်စွာ စမ်းသပ်ပျံသန်းလိုက်ပါတယ်။
ဒီလျှပ်စစ်တက္ကစီလေယာဉ်ဟာ ဒေါင်လိုက်တက်ဆင်းနိုင်တဲ့ နည်းပညာကို အသုံးပြုထားပြီး ပိုင်းလော့အပါအဝင် လူငါးဦး လိုက်ပါစီးနင်းနိုင်ပါတယ်။ လေယာဉ်ပေါ်က ဒလက်တွေကို စောင်းပြီး ပျံသန်းတဲ့ ပုံစံကြောင့် ဒေါင်လိုက်ပျံတက်ပြီးတာနဲ့ သာမန်လေယာဉ်တွေထက် ပိုမိုမြန်ဆန်တဲ့ အရှိန်ကို ရရှိစေတာပါ။
လျှပ်စစ်စွမ်းအင်သုံး ဖြစ်တာကြောင့် ပတ်ဝန်းကျင်ကို ညစ်ညမ်းစေတဲ့ အခိုးအငွေ့တွေ ထွက်မလာသလို ရဟတ်ယာဉ်တွေနဲ့ ယှဉ်ရင်လည်း အသံသိသိသာသာ ပိုငြိမ်တာက အားသာချက်တစ်ခု ဖြစ်ပါတယ်။
ပုံမှန်ဆိုရင် ကားနဲ့သွားရင် တစ်နာရီကနေ နှစ်နာရီအထိ ကြာမြင့်တတ်တဲ့ ဒီခရီးစဉ်ကို အခုလို ၁၀ မိနစ်အတွင်း ရောက်အောင် ပျံသန်းပေးနိုင်မှာ ဖြစ်ပါတယ်။ လောလောဆယ်မှာတော့ လုပ်ငန်းလည်ပတ်ခွင့် လက်မှတ်ရရှိဖို့အတွက် ဖက်ဒရယ်လေကြောင်းစီမံခန့်ခွဲမှုဦးစီးဌာန (FAA) နဲ့အတူ စမ်းသပ်မှုတွေ ဆက်တိုက် လုပ်ဆောင်နေတာ ဖြစ်ပါတယ်။
Ref : Fossbytes
