တရုတ်ပြည်တွင်း ကုမ္ပဏီတွေရဲ့ ထိုးစစ်ကို မခံနိုင်တော့တဲ့အဆုံး Samsung ကတော့ တရုတ်အိမ်သုံးလျှပ်စစ်ပစ္စည်းဈေးကွက်ကနေ လက်မြှောက်အရှုံးပေးပြီး ထွက်ခွာလိုက်ပြီ ဖြစ်ပါတယ်။ တရုတ်ကုမ္ပဏီတွေက ဈေးနှုန်းချိုချိုနဲ့ နည်းပညာအလန်းစားတွေ ထုတ်လာနိုင်တာကြောင့် Samsung ရဲ့ အိမ်သုံးပစ္စည်းနဲ့ တီဗီရောင်းအားဟာ တရိပ်ရိပ်ထိုးကျသွားခဲ့တာပါ။ ဒါပေမဲ့ ဝယ်ပြီးသားပစ္စည်းတွေအတွက် ပြုပြင်ထိန်းသိမ်းရေးဝန်ဆောင်မှုတွေကိုတော့ စားသုံးသူတွေ စိတ်မပူရအောင် ဆက်လက်ပေးအပ်သွားဦးမှာပါ။
တရုတ်ဈေးကွက်မှာ အိမ်သုံးပစ္စည်းတွေ ရောင်းတာရပ်လိုက်ပေမဲ့ ဆူကျိုးက Samsung စက်ရုံကြီးကတော့ ဆက်ရှိနေဦးမှာပါ။ ဒါပေမဲ့ အဲဒီစက်ရုံကထွက်တဲ့ ပစ္စည်းတွေကို တရုတ်ပြည်ထဲမှာ မရောင်းတော့ဘဲ တခြားနိုင်ငံတွေကို တင်ပို့ဖို့အတွက်ပဲ သီးသန့်ထုတ်လုပ်တော့မှာ ဖြစ်ပါတယ်။ အခုတော့ Samsung ဟာ တရုတ်ပြည်မှာ အရှုံးပေါ်နေတဲ့ အိမ်သုံးပစ္စည်းတွေဘက်ကနေ လှည့်ထွက်ပြီး အမြတ်ရနိုင်တဲ့ စမတ်ဖုန်းနဲ့ ဆီမီးကွန်ဒတ်တာ (Chip) လုပ်ငန်းတွေအပေါ်မှာပဲ အင်တိုက်အားတိုက် အာရုံစိုက်သွားတော့မှာပါ။
ဒီလို ဈေးကွက်ပြောင်းလဲမှုဟာ တရုတ်မှာတင်မကဘဲ တစ်ကမ္ဘာလုံးက Samsung ရဲ့ အိမ်သုံးပစ္စည်းလုပ်ငန်းတွေအထိပါ ရိုက်ခတ်လာနိုင်ပါတယ်။ ရေခဲသေတ္တာနဲ့ အဝတ်လျှော်စက်လို အဓိကပစ္စည်းတွေကိုတော့ Samsung ကိုယ်တိုင် ဆက်ထုတ်မှာဖြစ်ပေမဲ့ ပန်းကန်ဆေးစက်နဲ့ မိုက်ခရိုဝေ့ဖ်မီးဖိုလို ပစ္စည်းတွေကိုတော့ တခြားကုမ္ပဏီတွေဆီ အပ်ပြီးထုတ်ခိုင်းတဲ့ စနစ်ကို ပြောင်းဖို့ ပြင်ဆင်နေပါတယ်။ ဒါဟာ နည်းပညာလောကရဲ့ ထိပ်သီးကြီး Samsung အတွက်တော့ လုပ်ငန်းလည်ပတ်ပုံကို အကြီးအကျယ် ခွဲစိတ်ပြုပြင်လိုက်တာပဲ ဖြစ်ပါတယ်။
Ref : Bangkokpost
