ဒေါ်လာ ၂၅ သန်း အကုန်အကျခံကျင်းပမယ့် Jeff Bezos ရဲ့ မင်္ဂလာပွဲ

ဂျက်ဖ်ဘေးဇို့စ် (Jeff Bezos) နဲ့ လော်ရန်ဆန်းချက်ဇ် (Lauren Sánchez) တို့ရဲ့ မင်္ဂလာပွဲအကြောင်း နောက်ဆုံးရသတင်းတွေအရ သူတို့ရဲ့မင်္ဂလာပွဲဟာ အီတလီနိုင်ငံ၊ ဗင်းနစ်မြို့မှာ ဒီအပတ်အတွင်း (ဇွန်လ ၂၆-၂၈) ကျင်းပဖို့ စီစဉ်ထားတာဖြစ်ပါတယ်။

ဒါပေမဲ့ ဒီမင်္ဂလာပွဲဟာ ထူးခြားခမ်းနားမှုတွေနဲ့အတူ အငြင်းပွားဖွယ်ရာ ကိစ္စတွေ၊ ဆန္ဒပြမှုတွေနဲ့လည်း ရင်ဆိုင်နေရတာကို တွေ့ရပါတယ်။

အီတလီနိုင်ငံ၊ ဗင်းနစ် (Venice) မြို့မှာ ကျင်းပမှာဖြစ်ပါတယ်။ မူလက Scuola Grande della Misericordia လို့ခေါ်တဲ့ သမိုင်းဝင်ခန်းမမှာ ကျင်းပဖို့ ရည်ရွယ်ခဲ့ပေမယ့် လုံခြုံရေးအခြေအနေတွေနဲ့ ဒေသခံတွေရဲ့ ဆန္ဒပြမှုတွေကြောင့် Arsenale ခရိုင်ထဲက ပိုပြီးလုံခြုံတဲ့ နေရာတစ်ခုကို ပြောင်းရွှေ့ခဲ့တယ်လို့ သိရပါတယ်။

မင်္ဂလာပွဲအခမ်းအနားတွေကို ဇွန်လ ၂၆ ရက်ကနေ ၂၈ ရက်အထိ သုံးရက်ကြာ ကျင်းပသွားမှာဖြစ်ပါတယ်။ ဒေါ်လာသန်းပေါင်းများစွာ အကုန်အကျခံ ကျင်းပမယ့် ဒီပွဲအတွက် ဧည့်သည် ၂၀၀ ခန့်ကို ဖိတ်ကြားထားပြီး သူတို့တည်းခိုဖို့အတွက် ဟိုတယ်ကြီးတွေ၊ သွားလာရေးအတွက် ရေပေါ်တက္ကစီအများအပြားနဲ့ ဂျက်ဖ်ဘေးဇို့စ်ရဲ့ ဒေါ်လာသန်း ၅၀၀ တန် Koru အပျော်စီးသင်္ဘောကြီးကိုပါ ကြိုတင်ပြင်ဆင်ထားတယ်လို့ သတင်းတွေမှာ ဖော်ပြကြပါတယ်။ မင်္ဂလာပွဲ ကုန်ကျစားရိတ် က ဒေါ်လာ ၁၀ သန်း ကနေ ၂၅ သန်းအထိ ရှိမယ်လို့ သိရပါတယ်။

မင်္ဂလာပွဲမှာ ကမ္ဘာကျော်အဆိုတော်တွေဖြစ်တဲ့ Lady Gaga နဲ့ Elton John တို့က သီဆိုဖျော်ဖြေဖို့ သတင်းထွက်နေပါတယ်။

အငြင်းပွားမှုများနှင့် ဆန္ဒပြမှုများ

ဒီမင်္ဂလာပွဲကြောင့် ဗင်းနစ်မြို့ခံတွေနဲ့ တက်ကြွလှုပ်ရှားသူတွေကတော့ မြို့ကို ခေတ္တငှားရမ်းပြီး အဆမတန် ခမ်းနားတဲ့ပွဲ ကျင်းပတာကို မကြိုက်ကြပါဘူး။ “No Space for Bezos” (ဘေးဇို့စ်အတွက် နေရာမရှိ) ဆိုတဲ့ ဆိုင်းဘုတ်တွေ ကိုင်ဆောင်ပြီး ဆန္ဒပြမှုတွေ ပြုလုပ်ခဲ့ကြပါတယ်။ Greenpeace လိုမျိုး နိုင်ငံတကာသဘာဝပတ်ဝန်းကျင်အဖွဲ့ကလည်း ဒီဆန္ဒပြမှုတွေမှာ ပူးပေါင်းပါဝင်ခဲ့ပါတယ်။

ဒါကြောင့် ဂျက်ဖ်ဘေးဇို့စ်နဲ့ လော်ရန်ဆန်းချက်ဇ်တို့ရဲ့ မင်္ဂလာပွဲဟာ ကမ္ဘာက အာရုံစိုက်နေတဲ့ ခမ်းနားတဲ့ပွဲတစ်ခု ဖြစ်သလို၊ တစ်ချိန်တည်းမှာပဲ ဒေသခံတွေရဲ့ ဆန့်ကျင်မှုတွေနဲ့ ရင်ဆိုင်နေရတဲ့ ထူးခြားတဲ့အဖြစ်အပျက်တစ်ခုလည်း ဖြစ်နေပါတယ်။

Ref : Nation Thailand