ကမ္ဘာ့ပထမဆုံးအကြိမ်အဖြစ် လူတူ စက်ရုပ်တွေ ပါဝင်ယှဉ်ပြိုင်တဲ့ အားကစားပြိုင်ပွဲကြီးဖြစ်တဲ့ “World Humanoid Robot Games” ကို တရုတ်နိုင်ငံ၊ ပေကျင်းမြို့မှာ ဩဂုတ်လ ၁၅ ရက်နေ့ကနေ ၁၇ ရက်နေ့အထိ အောင်မြင်စွာ ကျင်းပပြီးစီးခဲ့ပါတယ်။ အဲဒီပြိုင်ပွဲဟာ နည်းပညာ၊ အားကစားနဲ့ ယဉ်ကျေးမှုကို ပေါင်းစပ်ပြီး စက်ရုပ်နည်းပညာရဲ့ နောက်ဆုံးပေါ် တိုးတက်မှုတွေကို ပြသနိုင်ခဲ့တဲ့ သမိုင်းဝင်ပွဲတစ်ခု ဖြစ်လာခဲ့ပါတယ်။
၂၀၂၂ ခုနှစ် ဆောင်းရာသီအိုလံပစ်အတွက် တည်ဆောက်ခဲ့တဲ့ အမျိုးသား စကိတ်ကွင်းကြီး (National Speed Skating Oval) မှာ ပြုလုပ်ခဲ့တဲ့ အဲဒီပွဲကို နိုင်ငံပေါင်း ၁၆ နိုင်ငံက အဖွဲ့ပေါင်း ၂၈၀ ကျော် ပါဝင်ခဲ့ပြီး စက်ရုပ် ၅၀၀ ကျော်က သူတို့ရဲ့ စွမ်းရည်တွေကို ယှဉ်ပြိုင်ခဲ့ကြပါတယ်။
ပြိုင်ပွဲတွေမှာ လူသားတွေရဲ့ အားကစားနည်းတွေဖြစ်တဲ့ မီတာ ၁၀၀ အပြေး၊ မီတာ ၁၅၀၀ အပြေး၊ ဘောလုံး၊ လက်ဝှေ့၊ ကွန်ဖူး၊ ကျွမ်းဘားလို ပြိုင်ပွဲတွေ ပါဝင်ခဲ့ပါတယ်။ ဒါ့အပြင် ဆေးရုံမှာ ဆေးတွေခွဲခြားတာ၊ သန့်ရှင်းရေးလုပ်တာလို လက်တွေ့ဘဝမှာ အသုံးဝင်တဲ့ လုပ်ငန်းဆောင်တာတွေကို စက်ရုပ်တွေက ဘယ်လောက်အထိ လုပ်ဆောင်နိုင်ပြီလဲဆိုတာကိုလည်း ထည့်သွင်းယှဉ်ပြိုင်ခဲ့ကြပါတယ်။
ဒီပြိုင်ပွဲမှာ တရုတ်နိုင်ငံရဲ့ Unitree ကုမ္ပဏီလို ပြည်တွင်းကုမ္ပဏီတွေအပြင် အမေရိကန်၊ ဂျာမနီနိုင်ငံတွေက ထိပ်တန်းနည်းပညာကုမ္ပဏီတွေနဲ့ တက္ကသိုလ်တွေက အဖွဲ့တွေလည်း ပါဝင်ခဲ့ကြပါတယ်။ အထူးသဖြင့် မီတာ ၁၅၀၀ အပြေးပြိုင်ပွဲမှာ တရုတ်နိုင်ငံထုတ် Unitree စက်ရုပ်တွေက ရွှေတံဆိပ်ဆုကို ဆွတ်ခူးနိုင်ခဲ့တာက ပွဲရဲ့ စိတ်လှုပ်ရှားစရာ အခိုက်အတန့်တွေထဲက တစ်ခုဖြစ်ခဲ့ပါတယ်။
ကျွမ်းကျင်သူတွေက ဒီပြိုင်ပွဲကို စက်ရုပ်နည်းပညာအတွက် အရေးပါတဲ့ သမိုင်းမှတ်တိုင်တစ်ခုအဖြစ် သတ်မှတ်ခဲ့ကြပါတယ်။ စက်ရုပ်တွေဟာ စက်ရုံအလုပ်ရုံတွေမှာ သတ်မှတ်ထားတဲ့ အလုပ်တွေကို လုပ်ဆောင်နိုင်တဲ့အဆင့်ကနေ လူသားတွေလို လှုပ်ရှားရတဲ့ အားကစားပြိုင်ပွဲတွေမှာ ပါဝင်လာနိုင်တာက ကြီးမားတဲ့ ခုန်ပျံကျော်လွှားမှုတစ်ခုဖြစ်တယ်လို့ သုံးသပ်ခဲ့ကြပါတယ်။
ပြိုင်ပွဲကျင်းပရေးကော်မတီက အခုလို စက်ရုပ်အားကစားပြိုင်ပွဲတွေကို နှစ်စဉ် ဆက်လက်ကျင်းပသွားဖို့ ရည်ရွယ်ထားကြောင်းနဲ့ နောက်နှစ် ၂၀၂၆ ခုနှစ် ဩဂုတ်လမှာ ဒုတိယအကြိမ်ပြိုင်ပွဲကို ပေကျင်းမြို့မှာပဲ ပြန်လည်ကျင်းပသွားမယ်လို့ ကြေညာခဲ့ပါတယ်။
Ref : bbc
