Samsung က Apple ကို မကြာခဏ လှောင်ပြောင်ထိုးနှက်နေပါတယ်။  “Can your phone do that?” (သင့်ဖုန်းမှာဒါလုပ်နိုင်လို့လား) ဆိုတဲ့ ကြော်ငြာထွက်ပြီး မကြာခင်မှာပဲ၊ ကုမ္ပဏီက “No shirt? No problem” (အင်္ကျီမပါဘူးလား? ပြဿနာမရှိ) ဆိုတဲ့ ကြော်ငြာအသစ်တစ်ခုကို ထပ်မံထုတ်လိုက်ပါတယ်။ အဲဒီကြော်ငြာက Galaxy AI က ဘာတွေလုပ်နိုင်တယ်၊ iPhone တွေက ဘာတွေမလုပ်နိုင်ဘူးဆိုတာကို အသားပေးပြသသွားပါတယ်။

Samsung ရဲ့ တရားဝင် X အကောင့်နဲ့ YouTube channel မှာ မျှဝေခဲ့တဲ့ အဲဒီဗီဒီယိုကလစ်ဟာ သူငယ်ချင်းနှစ်ယောက် ရေကူးကန်ဘေးမှာ အနားယူနေတဲ့ပုံနဲ့ စတင်ပါတယ်။ အင်္ကျီမဝတ်ဘဲ ထိုင်နေတဲ့ Galaxy Z Fold 7 ပိုင်ရှင်က သူအွန်လိုင်းမှာ share လို့ရမယ့် ဓာတ်ပုံတစ်ပုံကို လိုချင်နေပါတယ်။ သူ့ရဲ့ iPhone ကိုင်ထားတဲ့ သူငယ်ချင်းက ဓါတ်ပုံထဲက သူ့ရဲ့ဗလာကျင်းနေတဲ့ ရင်ဘတ်ကို စက္ကူတစ်ရွက်၊ သစ်ရွက်တစ်ရွက်လိုမျိုး ကြုံရာကျပန်းပစ္စည်းတွေနဲ့ ဖုံးပြီး ကူညီပေးဖို့ ကြိုးစားခဲ့ပေမယ့် အဲဒီလို ဖြစ်ကတတ်ဆန်းဖြေရှင်းနည်းတွေက တစ်ခုမှ အလုပ်မဖြစ်ခဲ့ပါဘူး။

အဲဒီအချိန်မှာပဲ Fold 7 က သူ့ရဲ့ AI စွမ်းရည်ကို ထုတ်ပြပါတော့တယ်။ Samsung သုံးစွဲသူက သူ့ကိုယ်သူ အင်္ကျီမပါတဲ့ ဓာတ်ပုံတစ်ပုံရိုက်ပြီး Sketch to Image ဆိုတဲ့ လုပ်ဆောင်ချက်ကိုသုံးပြီး သူ့ရဲ့ကိုယ်ပေါ်မှာ အင်္ကျီတစ်ထည်ကို ပုံကြမ်းဆွဲထည့်လိုက်ပါတယ်။ စက္ကန့်ပိုင်းအတွင်းမှာပဲ AI က သူဆွဲလိုက်တဲ့ ဒီဇိုင်းအတိုင်း တကယ့်အစစ်နဲ့တူတဲ့ အင်္ကျီတစ်ထည်ကို ဖန်တီးပေးပြီး အဲဒီဓာတ်ပုံကို share ဖို့အတွက် အကောင်းဆုံးပုံတစ်ပုံအဖြစ် ပြောင်းလဲပေးလိုက်ပါတယ်။ ကြော်ငြာရဲ့ အဓိကပြောချင်တဲ့စကားကတော့ “သင့်ဖုန်း ဒါလုပ်နိုင်လို့လား?” ဆိုတာပါပဲ။ iPhone သုံးတဲ့သူရဲ့ တုံ့ပြန်မှုကတော့ ရှက်ရှက်နဲ့ သူ့ဖုန်းကို လွှင့်ပစ်လိုက်တာပါပဲ။

ဒီကြော်ငြာနဲ့အတူ Samsung က sketch-to-image လိုမျိုး လုပ်ဆောင်ချက်တွေကို iPhone တွေမှာ လုံးဝမရနိုင်တာကို ပုံဖော်ပြီး သူ့ရဲ့ Galaxy AI စွမ်းရည်တွေကို ကြွားလုံးထုတ်လိုက်တာပါပဲ။ Apple ရဲ့ iPhone 17 မိတ်ဆက်ပွဲ မတိုင်ခင်လေးမှာ ထွက်လာတာဖြစ်လို့ အချိန်ကိုက်က တိုက်ဆိုင်မှုတစ်ခုတော့ မဟုတ်ပါဘူး။ Apple ကလည်း သူ့ရဲ့ကိုယ်ပိုင် AI နည်းပညာတွေအတွက် လုပ်ဆောင်နေတယ်လို့ သတင်းတွေထွက်နေပေမယ့် Samsung ကတော့ သူ့ရဲ့ ခေါက်ဖုန်းတွေမှာ အနာဂတ်ဆန်တဲ့ စွမ်းဆောင်ချက်တွေ ပါပြီးသားဖြစ်ကြောင်း သုံးစွဲသူတွေကို သတိပေးချင်နေပါတယ်။

စနောက်တာလား? ဟုတ်ပါတယ်။ ထိုးနှက်တာလား? ဖြစ်နိုင်ပါတယ်။ ဒါပေမဲ့ Samsung ပေးချင်တဲ့ သတင်းစကားကတော့ ရှင်းပါတယ်- AI ပြိုင်ပွဲမှာ Galaxy က ရှေ့တစ်လှမ်းသာနေပြီဆိုတာပါပဲ။

Ref: gizmochina