BITS Pilani Dubai က အင်ဂျင်နီယာကျောင်းသားတွေဖြစ်တဲ့ Eshel Wasim နဲ့ Dharsan Srinivasan တို့က Project REBIRTH လို့ခေါ်တဲ့ AI နည်းပညာသုံး လေယာဉ်မတော်တဆမှု အသက်ကယ်စနစ်တစ်ခုကို တီထွင်လိုက်ပါတယ်။ ဒီစနစ်ဟာ ပေ ၃,၀၀၀ အောက်မှာ လေယာဉ်ပျက်ကျတော့မယ့် အခြေအနေကို AI က ကြိုတင်သိရှိနိုင်ပြီး နှစ်စက္ကန့်အတွင်းမှာ လေယာဉ်ကိုယ်ထည်အပြင်ဘက်မှာရှိတဲ့ Airbag တွေကို ချက်ချင်းဖွင့်ပေးမှာ ဖြစ်ပါတယ်။
ဒီ Airbag တွေကို Kevlar, TPU, Zylon နဲ့ smart fluids လိုမျိုး ခေတ်မီပစ္စည်းတွေသုံးပြီး ပြုလုပ်ထားတာကြောင့် ပျက်ကျချိန်မှာ ဖြစ်ပေါ်လာတဲ့ ပြင်းထန်တဲ့အားကို စုပ်ယူပေးနိုင်ပါတယ်။ ကွန်ပျူတာ simulation တွက်ချက်မှုတွေအရ ပျက်ကျတဲ့အခါ ဖြစ်ပေါ်လာနိုင်တဲ့ ထိခိုက်ပျက်စီးမှုကို ၆၀% အထိ လျှော့ချပေးနိုင်မယ်လို့ ခန့်မှန်းထားပါတယ်။
ဒါ့အပြင် ကယ်ဆယ်ရေးလုပ်ငန်းတွေ လွယ်ကူစေဖို့အတွက် GPS tracker ၊ အနီအောက်ရောင်ခြည်သုံး အချက်ပြမီး (infrared beacons) တွေနဲ့ အဝေးကနေ မြင်နိုင်တဲ့ ဆေးရောင်တောက်တောက်တွေလည်း ဒီစနစ်မှာ ပါဝင်ပါတယ်။ ဒီစိတ်ကူးကို အိန္ဒိယလေကြောင်းလိုင်းရဲ့ လူသေဆုံးမှုများခဲ့တဲ့ လေယာဉ်ပျက်ကျမှုတစ်ခုကနေ အိုင်ဒီယာရခဲ့တာဖြစ်ပြီး လက်ရှိမှာတော့ ၁:၁၂ အချိုးအစားရှိတဲ့ ရှေ့ပြေးပုံစံငယ် (prototype) တစ်ခုကို တည်ဆောက်ထားပြီး ဖြစ်ပါတယ်။
ဒီ Project REBIRTH ဟာ ၂၀၂၅ ခုနှစ်အတွက် James Dyson Award ပြိုင်ပွဲမှာ ဝင်ရောက်ယှဉ်ပြိုင်နေပြီး ဆုကြေးအဖြစ် အမေရိကန်ဒေါ်လာ ၄၀,၀၀၀ ချီးမြှင့်မှာ ဖြစ်ပါတယ်။
Ref : Fossbytes
