Apple ဟာ iPad Pro series ဖြစ်တဲ့ ၁၃ လက်မနဲ့ ၁၁ လက်မ မော်ဒယ်အသစ်တွေကို ကြေညာလိုက်ပါတယ်။ မော်ဒယ်နှစ်မျိုးလုံးမှာ Apple ရဲ့ နောက်ဆုံးပေါ် chip တွေဖြစ်တဲ့ M5, N1 နဲ့ C1X တို့ကို ထည့်သွင်းပေးထားပါတယ်။
M5 ဟာ ဒီနေ့မှာပဲ မိတ်ဆက်လိုက်တဲ့ chip အသစ်စက်စက်တစ်ခုဖြစ်ပြီး ၁၄ လက်မ MacBook Pro နဲ့ Apple Vision Pro တွေမှာလည်း ပါဝင်လာမှာ ဖြစ်ပါတယ်။ သူ့မှာ performance core ၄ ခုနဲ့ efficiency core ၆ ခုအထိ ပါဝင်တဲ့ 10-core CPU ပုံစံကို အသုံးပြုထားပါတယ်။ M4 chip တုန်းကလိုပဲ Apple က M5 မှာပါတဲ့ performance core တွေဟာ ကမ္ဘာ့အမြန်ဆုံး CPU core တွေဖြစ်တယ်လို့ ထပ်မံကြေညာခဲ့ပါတယ်။ ဒါ့အပြင် core တစ်ခုချင်းစီမှာ သီးသန့် neural accelerator တွေပါဝင်တဲ့ 10-core GPU ဒီဇိုင်းအသစ်နဲ့လည်း ပေါင်းစပ်ထားပါတယ်။ memory bandwidth ကို 153GB/s အထိ တိုးမြှင့်ထားပြီး ray tracing စွမ်းဆောင်ရည်ကိုလည်း မြှင့်တင်ထားပါတယ်။
M4 chip နဲ့ နှိုင်းယှဉ်ရင် M5 ဟာ neural accelerator အသစ်တွေကြောင့် AI စွမ်းဆောင်ရည် ၃.၅ ဆ ပိုကောင်းလာတယ်လို့ ဆိုပါတယ်။ ray tracing ပါဝင်တဲ့ 3D rendering စွမ်းဆောင်ရည်က ၁.၅ ဆ တိုးတက်လာပါတယ်။ Final Cut Pro မှာ ဗီဒီယိုပြောင်းတဲ့အခါမှာလည်း M5 က ၁.၂ ဆ ပိုမြန်ပါတယ်။
M5 chip အသစ်ကြောင့် video out လုပ်နိုင်စွမ်းတွေလည်း ပိုကောင်းလာပါတယ်။ iPad Pro မော်ဒယ်အသစ်တွေဟာ external display တွေကို 120Hz အထိ output ထုတ်ပေးနိုင်ပါပြီ။ ဒါ့အပြင်၊ ကိုက်ညီတဲ့ display တွေနဲ့ အသုံးပြုမယ်ဆိုရင် Adaptive Sync (VRR) ကိုလည်း support လုပ်လာပါတယ်။
ပိုမြန်တဲ့ chip တွေနဲ့အတူ iPad Pro မော်ဒယ်တွေရဲ့ memory ပမာဏကိုလည်း တိုးမြှင့်ပေးထားပါတယ်။ 256GB နဲ့ 512GB မော်ဒယ်တွေမှာ memory ကို 8GB ကနေ 12GB အထိ စံအဖြစ် တိုးမြှင့်ပေးထားပြီး 1TB နဲ့ 2TB မော်ဒယ်တွေကတော့ 16GB အတိုင်းပဲ ဆက်ရှိနေမှာဖြစ်ပါတယ်။
CPU နဲ့ GPU စွမ်းဆောင်ရည်တွေ တိုးမြှင့်လိုက်တာအပြင်၊ iPad Pro မော်ဒယ်အသစ်တွေမှာ ဒီနှစ် iPhone မော်ဒယ်တွေမှာ ပထမဆုံးစတင်အသုံးပြုခဲ့တဲ့ N1 wireless networking chip နဲ့ C1X modem တို့ကို ထည့်သွင်းပေးထားတာကြောင့် ကွန်ရက်ချိတ်ဆက်နိုင်စွမ်းတွေလည်း ပိုကောင်းလာပါတယ်။
နောက်ဆုံးအဆင့်မြှင့်တင်မှုကတော့ အားသွင်းစနစ်ပဲ ဖြစ်ပါတယ်။ iPad Pro မော်ဒယ်တွေဟာ အခုဆိုရင် iPhone 17 မော်ဒယ်တွေလိုပဲ fast charging standard ကို support လုပ်လာပါပြီ။ Apple ရဲ့ နာမည်ထူးထူးဆန်းဆန်းနဲ့ 40W Dynamic Power Adapter with 60W Max လိုမျိုး ကိုက်ညီတဲ့ အားသွင်းခေါင်းတစ်ခုခုကို အသုံးပြုမယ်ဆိုရင် ၁၁ လက်မ မော်ဒယ်ကို မိနစ် ၃၀ အတွင်း ၅၀% အထိ၊ ၁၃ လက်မ မော်ဒယ်ကိုတော့ မိနစ် ၃၅ မိနစ်အတွင်း ၅၀% အထိ အားသွင်းနိုင်မှာ ဖြစ်ပါတယ်။
အဲဒီအပြောင်းအလဲတွေကလွဲရင် iPad Pro မော်ဒယ်အသစ်တွေဟာ M4 chip အသုံးပြုထားတဲ့ အရင်မော်ဒယ်တွေနဲ့ ထပ်တူနီးပါး တူညီပါတယ်။ ဒါကြောင့် Tandem OLED Ultra Retina XDR display တွေ၊ ကျောဘက်က 12MP ကင်မရာနဲ့ ရှေ့ဘက်က 12MP Centre Stage ကင်မရာ၊ စပီကာလေးလုံးပါတဲ့စနစ်နဲ့ Thunderbolt/USB4 ချိတ်ဆက်မှုတို့ကတော့ အရင်အတိုင်းပဲ ဖြစ်ပါတယ်။
ဈေးနှုန်းတွေကတော့ အရင်အတိုင်း မပြောင်းလဲဘဲ ၁၁ လက်မ မော်ဒယ်အတွက် ဒေါ်လာ ၉၉၉ ကနေ စတင်ပြီး ၁၃ လက်မ မော်ဒယ်အတွက်ကတော့ ဒေါ်လာ ၁,၂၉၉ ကနေ စတင်မှာ ဖြစ်ပါတယ်။ Cellular ပါတဲ့ မော်ဒယ်တွေကတော့ ၁,၁၉၉ ဒေါ်လာနဲ့ ၁,၄၉၉ ဒေါ်လာ အသီးသီးကနေ စတင်မှာ ဖြစ်ပါတယ်။
Ref : gsmarena
