နိုဝင်ဘာလ ၂၅ ရက်ကပဲ Qualcomm ဟာ ၂၀၂၃ ခုနှစ်တုန်းက ထွက်ရှိခဲ့တဲ့ Snapdragon 8 Gen 3 ရဲ့ မျိုးဆက်သစ်လို့ ပြောလို့ရမယ့် သူတို့ရဲ့ နောက်ဆုံးထွက် Snapdragon chipset ကို မိတ်ဆက်ပြသလိုက်ပါတယ်။ အခုတော့ ဒီ chipset ကို ဘယ်စမတ်ဖုန်းမှာ အရင်ဆုံး တွေ့မြင်ရမလဲဆိုတာ သိရပါပြီ။ အံ့သြစရာကောင်းတာက ဒီ chipset ကို ပူးပေါင်းတီထွင်ရာမှာ သူတို့က အဓိကအခန်းကဏ္ဍကနေ ပါဝင်ခဲ့တယ်လို့ ပြောထားတဲ့ ဖုန်းထုတ်လုပ်သူ (OEM) ဆီက ဖြစ်နေတာပါပဲ။
Snapdragon 8 Gen 5 ကို ပထမဆုံး အသုံးပြုလာမယ့် စမတ်ဖုန်းကတော့ OnePlus 15R ဖြစ်ပါတယ်။ ဒီ chipset ဟာ Qualcomm ရဲ့ နောက်ဆုံးထွက် “Elite” ဗားရှင်းမဟုတ်တဲ့ chip တစ်ခုဖြစ်ပြီး စွမ်းဆောင်ရည်မြင့် CPU အမြန်နှုန်း အနည်းငယ် လျော့နည်းတာကလွဲရင် ကျန်တဲ့ specs နဲ့ လုပ်ဆောင်ချက် အများစုကတော့ အတူတူပဲ ဖြစ်ပါတယ်။ Qualcomm ရဲ့ ကြေညာချက်မှာ OnePlus ဟာ မိတ်ဖက်ကုမ္ပဏီတစ်ခု ဖြစ်ကြောင်း အတည်ပြုခဲ့တာကြောင့် မကြာသေးခင်ကမှ သတင်းထွက်ထားတဲ့ 15R ရဲ့ chipset ကိစ္စက သေချာသလောက် ဖြစ်သွားခဲ့ပါတယ်။ ဒါ့အပြင် OnePlus ဘက်ကလည်း တော်တော်လေး အံ့သြစရာကောင်းတဲ့ အချက်တစ်ချက်ကို အတည်ပြုခဲ့ပါသေးတယ်။ အဲဒါကတော့ Snapdragon 8 Gen 5 ကို တီထွင်ဖန်တီးရာမှာ သူတို့က အဓိကနေရာကနေ ပါဝင်ခဲ့တယ် ဆိုတာပါပဲ။
OnePlus ရဲ့ အဆိုအရ သူတို့ဟာ Snapdragon 8 Gen 3 ထွက်ရှိပြီး မကြာခင်မှာပဲ နောက်ထပ် chipset တစ်ခု အတူတူ ဖန်တီးဖို့အတွက် Qualcomm ကို ကမ်းလှမ်းခဲ့တယ်လို့ သိရပါတယ်။ ပြီးခဲ့တဲ့ ဒီဇင်ဘာလလောက်ကတည်းက specs တွေကို အတည်ပြုခဲ့ပြီး ဒီနေ့ ကြေညာချက်အတွက် ပြင်ဆင်ခဲ့ကြတာ ဖြစ်သလို OnePlus အနေနဲ့လည်း “ကမ္ဘာ့ပထမဆုံး မိတ်ဖက်ကုမ္ပဏီ” ဖြစ်လာခဲ့ပါတယ်။ OnePlus ဟာ ဒီ chipset အတွက် စွမ်းဆောင်ရည် (performance)၊ ဂိမ်း (gaming)၊ ပုံရိပ်ဖော်စနစ် (imaging)၊ AI၊ မျက်နှာပြင် (display)၊ ချိတ်ဆက်မှု (connectivity) နဲ့ ကွန်ရက် (network) ဆိုတဲ့ အဓိက နယ်ပယ် ၇ ခုကို အာရုံစိုက်ထားကြောင်းနဲ့ ဒီ chip အသစ်ကို ချိန်ညှိဖို့အတွက် ၂၄ လကြာအောင် လုပ်ဆောင်ခဲ့ကြောင်း ပြောကြားပြီး သူတို့ရဲ့ လက်ရာအပေါ် ဂုဏ်ယူနေပုံ ပေါ်ပါတယ်။
ရလဒ်ကတော့ ၂၀၂၄ ခုနှစ် Android flagship ဖုန်းတော်တော်များများနဲ့ ဒီနှစ်ထွက် OnePlus 13R လို ဖုန်းတွေမှာ သုံးထားတဲ့ Snapdragon 8 Gen 3 ရဲ့ နောက်ဆက်တွဲ chipset တစ်ခု ထွက်ပေါ်လာတာပါပဲ။ ဒီ chipset က ဘယ်လိုပုံစံမျိုးနဲ့ ဈေးကွက်ထဲ ရောက်လာမလဲဆိုတာ ကျွန်တော်ကတော့ တော်တော်လေး စိတ်လှုပ်ရှားမိပါတယ်။ Snapdragon 8 Elite Gen 5 က အရမ်းကောင်းမွန်လွန်းပေမယ့် သုံးစွဲသူ တော်တော်များများအတွက်တော့ လိုတာထက် ပိုကောင်းနေတယ် (overkill ဖြစ်နေတယ်) လို့ ယူဆနိုင်ပါတယ်။ တကယ်လို့များ ဖုန်းထုတ်လုပ်သူတွေကသာ Snapdragon 8 Gen 5 ကို ကောင်းကောင်း အသုံးချနိုင်မယ်ဆိုရင် ၂၀၂၆ ခုနှစ်မှာ တန်ဖိုးသင့်တဲ့ မိုဘိုင်းဖုန်း အမိုက်စားတွေ ထွက်လာနိုင်ပါလိမ့်မယ်။ ဒါပေမဲ့ သက်သာလာတဲ့ ကုန်ကျစရိတ်တွေကို စားသုံးသူတွေဆီ တကယ်ပဲ ပြန်ပေးမလား ဆိုတာကိုတော့ စောင့်ကြည့်ရဦးမှာပါ။
Ref : 9to5Google
