တရုတ်နိုင်ငံက တက်စလာ (Tesla) ယာဉ်မောင်းတချို့ဟာ ကားအတွင်းပိုင်းမှာ တပ်ဆင်ထားတဲ့ ယာဉ်မောင်းစောင့်ကြည့်ရေးစနစ်ကို လှည့်စားဖို့အတွက် ဟောလိဝုဒ်မင်းသား ဒွန်းဂျွန်ဆင် (The Rock) လိုမျိုး အနုပညာရှင်တွေရဲ့ ပုံသဏ္ဌာန်တုပထားတဲ့ ပလတ်စတစ် အရုပ်ခေါင်းအသေးလေးတွေကို အသုံးပြုနေကြတယ်လို့ သိရပါတယ်။ တက်စလာရဲ့ Autopilot နဲ့ Full Self-Driving စနစ်တွေဟာ ယာဉ်မောင်းက လမ်းမပေါ် အာရုံစိုက်ရဲ့လားဆိုတာကို သိနိုင်ဖို့ ကားအတွင်းကင်မရာနဲ့ စောင့်ကြည့်တာဖြစ်ပြီး အာရုံလွဲနေရင် သတိပေးချက်ထုတ်ပြန်တာ (သို့) စနစ်သုံးစွဲမှုကို ကန့်သတ်တာမျိုး ပြုလုပ်တာ ဖြစ်ပါတယ်။
အဲဒီယာဉ်မောင်းတွေဟာ အရုပ်ခေါင်းလေးတွေကို နောက်ကြည့်မှန် (ဒါမှမဟုတ်) ရှေ့လေကာမှန်အနီးမှာ ထားရှိပြီး ယာဉ်မောင်းရဲ့ မျက်နှာအစစ်အစား အဲဒီမျက်နှာတုကို ကင်မရာက မြင်တွေ့အောင် လုပ်ဆောင်ကြတာပါ။ ဒါကြောင့် ယာဉ်မောင်းက ဖုန်းကြည့်နေတာ၊ တခြားနေရာအာရုံရောက်နေတာ (သို့) အနားယူနေတာမျိုး ရှိနေရင်တောင်မှ စနစ်ကတော့ ယာဉ်မောင်းဟာ လမ်းပေါ်ကိုပဲ အာရုံစိုက်နေတယ်လို့ ထင်မှတ်သွားစေပါတယ်။
လက်ရှိမှာ အဲဒီအရုပ်ခေါင်းတွေကို တရုတ်အွန်လိုင်းဈေးကွက်တွေပေါ်မှာ အမေရိကန်ဒေါ်လာ ၁၀ ဒေါ်လာကနေ ၄၀ ဒေါ်လာဝန်းကျင်နဲ့ ရောင်းချနေပြီး ကားအလှဆင်ပစ္စည်းအဖြစ် အသုံးများလာနေတာပါ။ အခုလို အရုပ်ခေါင်းကို သုံးပြီး ကားမောင်းစနစ်ကို လှည့်စားကာ အဝေးပြေးလမ်းမတွေပေါ်မှာ သတိပေးချက်မတက်ဘဲ မောင်းနှင်နိုင်ခဲ့တဲ့ ဗီဒီယိုတွေ ပျံ့နှံ့လာတဲ့အတွက် နည်းပညာကို လွဲမှားစွာအသုံးပြုမှုနဲ့ လမ်းအန္တရာယ်ကင်းရှင်းရေးအပေါ် စိုးရိမ်ပူပန်မှုတွေ ထွက်ပေါ်နေပါတယ်။
Ref : Technology Innovation
