အမေရိကန် လူဝင်မှုကြီးကြပ်ရေးနဲ့ အကောက်ခွန် ဌာန (ICE) ဟာ တရားဥပဒေစိုးမိုးရေး လုပ်ငန်းစဉ်တွေ လုပ်ဆောင်တဲ့အခါ အန္တရာယ်ရှိပြီး သွားလာဖို့ ခက်ခဲတဲ့ နေရာတွေကို စစ်ဆေးဖို့အတွက် စက်ရုပ်ခွေးတွေကို ဝယ်ယူဖို့ စီစဉ်နေပါတယ်။ ပြည်တွင်းလုံခြုံရေးဌာနရဲ့ ဝယ်ယူရေး ကြေညာချက်အရ ICE ဟာ Boston Dynamics က ထုတ်လုပ်တဲ့ Spot စက်ရုပ်တွေနဲ့ ဆက်စပ်ပစ္စည်းတွေအတွက် ဒေါ်လာ ၁ သန်းကနေ ၂ သန်းအထိ သုံးစွဲဖို့ စဉ်းစားနေတာ ဖြစ်ပါတယ်။
Spot လို့ခေါ်တဲ့ ခြေလေးချောင်းထောက် စက်ရုပ်ဟာ ကြမ်းတမ်းတဲ့ မြေပြင်တွေမှာ လမ်းလျှောက်နိုင်ပြီး လှေကားတက်တာနဲ့ အတားအဆီးတွေကို ကျော်ဖြတ်သွားလာနိုင်စွမ်း ရှိပါတယ်။ အလေးချိန် ၇၄.၅ ပေါင် (၃၃.၈ ကီလိုဂရမ်) ရှိပြီး တစ်နာရီကို ၃.၆ မိုင် (၁.၆ မီတာ/စက္ကန့်) အထိ သွားလာနိုင်သလို ဘက်ထရီအားနဲ့ မိနစ် ၉၀ ခန့် အလုပ်လုပ်နိုင်ပါတယ်။ အဲဒီ စက်ရုပ်မှာ ကင်မရာတွေ၊ အာရုံခံကိရိယာတွေအပြင် စက်ရုပ်လက်တံ အပါအဝင် တခြား ထပ်ဆောင်းကိရိယာတွေကိုလည်း တပ်ဆင်နိုင်ပါတယ်။
လူတွေ ဝင်ရောက်ဖို့ အန္တရာယ်ရှိတဲ့ နေရာတွေ၊ ကျဉ်းမြောင်းပြီး မတည်ငြိမ်တဲ့ နေရာတွေမှာ စစ်ဆေးရေးလုပ်ငန်းတွေ၊ အခြေအနေ စောင့်ကြည့်တာတွေနဲ့ အန္တရာယ် အကဲဖြတ်တာတွေ လုပ်ဆောင်ဖို့ ဒီစက်ရုပ်တွေက အရာရှိတွေကို ကူညီပေးနိုင်မယ်လို့ ICE က ဆိုပါတယ်။ အဲဒီ စက်ရုပ်တွေကို တိုက်ခိုက်ရေးခွေးတွေ ဒါမှမဟုတ် ကိုယ်ပိုင်အသိဉာဏ်နဲ့ အလုပ်လုပ်တဲ့ လက်နက်တွေအဖြစ် အသုံးပြုမှာ မဟုတ်ဘူးလို့ သိရပါတယ်။ လက်ရှိအချိန်မှာတော့ ဒါဟာ ဝယ်ယူဖို့ စီစဉ်နေဆဲ အဆင့်မှာသာ ရှိနေသေးတာ ဖြစ်ပါတယ်။
Ref : Technology Innovation
