ဘီလ်ဂိတ် က ဉာဏ်ရည်တု (AI) နည်းပညာ အလျင်အမြန် တိုးတက်လာတာနဲ့အမျှ အလုပ်အကိုင်၊ စီးပွားရေးနဲ့ လူ့အဖွဲ့အစည်းမှာ ကြီးမားတဲ့ အပြောင်းအလဲတွေ ဖြစ်ပေါ်လာနိုင်တယ်လို့ သတိပေးထားပါတယ်။ အခုအချိန်ဟာ မတည်ငြိမ်တဲ့ AI ခေတ်ကို ရောက်နေပြီဖြစ်လို့ အစိုးရတွေအနေနဲ့ ကြိုတင်ပြင်ဆင်မှုတွေ လုပ်ဆောင်သင့်တယ်လို့ သူက ဆိုပါတယ်။ ဥပဒေ၊ ဖောက်သည်ဝန်ဆောင်မှု၊ ဆေးဘက်ဆိုင်ရာ၊ ဆော့ဖ်ဝဲနဲ့ ကုန်ထုတ်လုပ်မှု လုပ်ငန်းတွေမှာ AI က အစားထိုး ဝင်ရောက်လာနိုင်ပါတယ်။
ကုမ္ပဏီတွေက အလုပ်တွေမှာ AI ကို ပိုမိုအသုံးပြုလာတဲ့အတွက် လူငယ်တွေရဲ့ အလုပ်အကိုင် အခွင့်အလမ်းတွေ လျော့ကျသွားနိုင်တယ်လို့ သူက အထူးစိုးရိမ်နေပါတယ်။ AI ရဲ့ စီးပွားရေး အကျိုးအမြတ်တွေကို လူတစုကသာ ရရှိမယ်ဆိုရင် မညီမျှမှုတွေ ပိုများလာနိုင်ပါတယ်။ ဒါ့အပြင် ရာဇဝတ်ကောင်တွေက AI ကို အလွဲသုံးစားလုပ်တာ၊ AI စနစ်တွေက မထင်မှတ်ထားတဲ့ အပြုအမူတွေ လုပ်ဆောင်တာနဲ့ ကလေးတွေက AI အဖော်တွေအပေါ် အလွန်အမင်း မှီခိုလာတာစတဲ့ အန္တရာယ်တွေကိုလည်း သူက ထောက်ပြထားပါတယ်။
အဲဒီ ပြဿနာတွေကို ဖြေရှင်းဖို့အတွက် AI ဒါမှမဟုတ် စက်ရုပ်တွေ လုပ်နိုင်ရင်တောင်မှ လူသားတွေအတွက်သာ သီးသန့်ဖယ်ထားရမယ့် အလုပ်အကိုင်တွေ ဖန်တီးပေးဖို့ သူက အကြံပြုထားပါတယ်။ AI နဲ့ စက်ရုပ်တွေကို အခွန်ကောက်ခံပြီး အဲဒီငွေတွေကို အလုပ်သမားတွေအတွက် ပြန်လည်လေ့ကျင့်ပေးတာနဲ့ လူမှုရေး အစီအစဉ်တွေမှာ သုံးစွဲသင့်တယ်လို့လည်း သူက ထောက်ခံထားပါတယ်။ ဒီလို အန္တရာယ်တွေ ရှိပေမယ့်လည်း ကြိုတင်ပြင်ဆင်မှုတွေ သေချာလုပ်ထားမယ်ဆိုရင် AI ဟာ ကျန်းမာရေး၊ ပညာရေးနဲ့ စီးပွားရေး ကဏ္ဍတွေအတွက် ကြီးမားတဲ့ အကျိုးကျေးဇူးတွေ ယူဆောင်လာပေးနိုင်ပါတယ်။
Ref : Technology Innovation
