နည်းပညာတွေ တိုးတက်လာပေမဲ့ ကုမ္ပဏီတွေအနေနဲ့ AI ကို အကြောင်းပြပြီး ဝန်ထမ်းတွေကို အလုပ်ဖြုတ်လို့မရဘူးဆိုတဲ့ ထူးခြားတဲ့ စီရင်ချက်တစ်ခု တရုတ်နိုင်ငံ၊ ဟန်ကျိုးမြို့မှာ ထွက်ပေါ်လာပါတယ်။
ဒီအမှုဟာ ၂၀၂၂ ခုနှစ်ကတည်းက နည်းပညာကုမ္ပဏီတစ်ခုမှာ AI ရဲ့ အလုပ်တွေကို ပြန်လည်စစ်ဆေးပေးရတဲ့ ကြီးကြပ်မှူး ရှောင်ကျိုးနဲ့ ပတ်သက်နေတာပါ။ အစကတော့ AI ကို စစ်ဆေးဖို့ ခန့်ထားတာဖြစ်ပေမဲ့ နောက်ပိုင်းမှာတော့ ကုမ္ပဏီက သူ့နေရာမှာ AI နဲ့ပဲ အစားထိုးဖို့ ကြံစည်ခဲ့တာ ဖြစ်ပါတယ်။
ပြီးခဲ့တဲ့ ၂၀၂၅ ခုနှစ်မှာ ကုမ္ပဏီက ရှောင်ကျိုးကို သူ့နေရာမှာ Large Language Model (LLM) နဲ့ အစားထိုးတော့မှာ ဖြစ်တာကြောင့် ရာထူးချထားမှုကို လက်ခံဖို့နဲ့ လစာ ၄၀ ရာခိုင်နှုန်း လျှော့ယူဖို့ ဖိအားပေးခဲ့ပါတယ်။
ရှောင်ကျိုးက ဒါကို လက်မခံဘဲ ငြင်းဆန်ခဲ့တဲ့အတွက် ကုမ္ပဏီက သူ့ကို အလုပ်ထုတ်ပစ်လိုက်ပြီး နစ်နာကြေး ဒေါ်လာ ၄၅,၀၀၀ ဝန်းကျင် ပေးခဲ့ပါတယ်။ ဒါပေမဲ့ ရှောင်ကျိုးက အရှုံးမပေးဘဲ အစိုးရရဲ့ အလုပ်သမားရေးရာ အဖွဲ့ကနေတစ်ဆင့် တရားဥပဒေကြောင်းအရ ပြန်လည်ရင်ဆိုင်ခဲ့တာပါ။
နောက်ဆုံးမှာတော့ တရားရုံးက ရှောင်ကျိုးဘက်ကနေ အနိုင်ပေးလိုက်ပြီး အခုလို အလုပ်ထုတ်တာဟာ တရားမဝင်ဘူးလို့ ဆုံးဖြတ်ခဲ့ပါတယ်။ ကုမ္ပဏီတွေထဲမှာ AI နည်းပညာကို အသုံးပြုလာတာဟာ ဝန်ထမ်းတွေနဲ့ ချုပ်ဆိုထားတဲ့ အလုပ်ခန့်ထားမှု စာချုပ်တွေကို ဖျက်သိမ်းဖို့ ခိုင်လုံတဲ့ အကြောင်းပြချက် မဟုတ်ဘူးလို့ တရားရုံးက ပြတ်ပြတ်သားသား ထောက်ပြသွားခဲ့ပါတယ်။ အခုစီရင်ချက်ဟာ AI ခေတ်မှာ အလုပ်အကိုင် လုံခြုံမှုအတွက် စံနမူနာပြ အမှုတစ်ခု ဖြစ်လာခဲ့ပါတယ်။
Ref: Fossbytes
