ဆွီဒင်နိုင်ငံ ဂိုသမ်ဘတ်မြို့ (Gothenburg) မှာ ခရီးသည်တွေဆီကနေ ယာဉ်စီးခ စတင်ကောက်ခံပြီး ပထမဆုံးအကြိမ် ပြေးဆွဲတဲ့ မောင်းသူမဲ့လျှပ်စစ်ဘတ်စ်ကားတစ်စီးဟာ ခရီးစဉ်စတင်ပြီး တစ်နာရီဝန်းကျင်အကြာမှာပဲ လမ်းရထား (Tram) တစ်စီးနဲ့ တိုက်မိသွားတဲ့ ဖြစ်စဉ်တစ်ခု ဖြစ်ပွားခဲ့ပါတယ်။ အများပြည်သူသယ်ယူပို့ဆောင်ရေးအာဏာပိုင်အဖွဲ့ Västtrafik က ပြေးဆွဲတဲ့ အဲဒီဘတ်စ်ကားဟာ လမ်းမပေါ်မှာ ရုတ်တရက်ကြီး ဘရိတ်ဆောင့်အုပ်လိုက်တာကြောင့် နောက်ကနေ ကပ်ပါလာတဲ့ လမ်းရထားက ဘတ်စ်ကားနောက်မြီးကို အရှိန်နဲ့ ဝင်တိုက်မိခဲ့တာ ဖြစ်ပါတယ်။ တူရကီနိုင်ငံထုတ် Karsan အမျိုးအစား အဆိုပါမောင်းသူမဲ့ဘတ်စ်ကားဟာ ၂၀၂၆ ခုနှစ် မတ်လကတည်းက လမ်းပေါ်မှာ စမ်းသပ်မောင်းနှင်မှုတွေ လုပ်ဆောင်နေခဲ့တာဖြစ်ပြီး အန္တရာယ်ကင်းရှင်းရေးအတွက် ယာဉ်မောင်းတစ်ဦးလည်း အမြဲတမ်း အနောက်ကနေ စောင့်ကြည့်လိုက်ပါလာခဲ့တာ ဖြစ်ပါတယ်။
ဒီမတော်တဆမှုကြောင့် ဘတ်စ်ကားပေါ်ပါလာတဲ့ ခရီးသည်တွေနဲ့ ဝန်ထမ်းတွေ ကံကောင်းထောက်မစွာနဲ့ တစ်ဦးတစ်ယောက်မှ ထိခိုက်ဒဏ်ရာရရှိခဲ့ခြင်း မရှိပါဘူး။ ဒါပေမဲ့လည်း ယာဉ်နှစ်စီးစလုံး တော်တော်လေး ထိခိုက်ပျက်စီးသွားခဲ့တာကြောင့် အဆိုပါမောင်းသူမဲ့ဘတ်စ်ကားကို အသေးစိတ်စစ်ဆေးမှုတွေလုပ်ဖို့အတွက် ပြေးဆွဲမှုရပ်နားပြီး ဂိတ်ကို ပြန်လည်သိမ်းဆည်းသွားခဲ့ပါတယ်။ အခုစမ်းသပ်ပြေးဆွဲမှုကို ၂၀၂၇ ခုနှစ် ဇူလိုင်လအထိ လုပ်ဆောင်သွားဖို့ ခွင့်ပြုချက်ရရှိထားတာ ဖြစ်ပါတယ်။
အခုဖြစ်စဉ်ဟာ မြို့ပြရဲ့တကယ့်ယာဉ်ကြောပိတ်ဆို့မှုတွေကြားထဲမှာ မောင်းသူမဲ့သယ်ယူပို့ဆောင်ရေးစနစ်ကို စမ်းသပ်ဖို့ ဆွီဒင်နိုင်ငံရဲ့ ကြိုးပမ်းမှုတစ်ခုဖြစ်ပြီး ယာဉ်မျိုးစုံရောနှောနေတဲ့ လမ်းမတွေပေါ်မှာ မောင်းသူမဲ့စနစ်တွေရဲ့ ဘေးအန္တရာယ်ကင်းရှင်းမှုနဲ့ပတ်သက်လို့ မေးခွန်းထုတ်စရာတွေ ထပ်မံထွက်ပေါ်လာစေခဲ့ပါတယ်။
Ref : Technology Innovation
