Vertu ဟာ Quantum Flip ပြီးနောက်မှာတော့ သူတို့ရဲ့ ပထမဆုံး စာအုပ်ပုံစံခေါက်ဖုန်း AlphaFold ကို ကမ္ဘာအနှံ့မှာ စတင်ရောင်းချလိုက်ပါတယ်။ ဒီဖုန်းဟာ သာမန်တန်ဖိုးကြီးဖုန်းတွေလို ပရီမီယံပစ္စည်းတွေ သုံးထားရုံတင်မကဘဲ Hermes AI စနစ်ကို အဓိကထည့်သွင်းပေးထားတာကြောင့် စာချုပ်တွေကို စိစစ်တာ၊ အချက်အလက်တွေကို အကျဉ်းချုပ်တာနဲ့ အက်ပ်ပေါင်း ၇၀ ကျော်ကို စီမံခန့်ခွဲတာမျိုးတွေအထိ လုပ်ဆောင်ပေးနိုင်ပါတယ်။
ဒါ့အပြင် သီးသန့်လုံခြုံရေး A5 Chip ပါဝင်တဲ့အပြင် လိုင်းမမိတဲ့နေရာတွေမှာပါ အသုံးပြုနိုင်ဖို့ ဂြိုဟ်တုကနေတစ်ဆင့် ဆက်သွယ်နိုင်တဲ့စနစ်နဲ့ ၂၄ နာရီပတ်လုံး ဝန်ဆောင်မှုပေးမယ့် Concierge စနစ်လည်း ပါဝင်ပါတယ်။
နည်းပညာပိုင်းမှာတော့ အဆင့်မြင့် Snapdragon 8 Elite Processor ကို သုံးထားပြီး လုပ်ငန်းခွင်မှာ ၂၈ နာရီအထိ အသုံးခံမယ့် 6,500mAh ဘက်ထရီနဲ့ မိနစ် ၂၀ အတွင်း အား ၅၀ ရာခိုင်နှုန်းအထိ ပြည့်စေမယ့် 65W အားသွင်းစနစ် ပါဝင်ပါတယ်။
ဖုန်းမျက်နှာပြင်ကို အပြင်ဘက် ၆.၅၃ လက်မနဲ့ အတွင်းဘက် ၈.၀၅ လက်မအထိ ကျယ်ကျယ်ဝန်းဝန်း သုံးနိုင်မှာဖြစ်ပြီး အနောက်ဘက်မှာ 50MP ပင်မကင်မရာအပါအဝင် ကင်မရာသုံးလုံး တပ်ဆင်ထားပါတယ်။
ဖုန်းရဲ့ကိုယ်ထည်ပိုင်းကိုတော့ နွားသားရေ၊ မိကျောင်းသားရေတွေအပြင် ၁၈ ကာရက်ရွှေနဲ့ အရည်အသွေးမြင့်စိန်တွေကိုပါ စိတ်ကြိုက်ရွေးချယ် မှာယူနိုင်မှာပါ။
Vertu AlphaFold ကို အခုဆိုရင် တရားဝင်ဝဘ်ဆိုက်မှာ တိုက်ရိုက်ဝယ်ယူနိုင်ပြီဖြစ်ပြီး အခြေခံမော်ဒယ်အတွက်တင် ဈေးနှုန်းဟာ အမေရိကန်ဒေါ်လာ ၆,၈၈၀ (မြန်မာငွေ သိန်းရာချီ) ရှိမှာဖြစ်ပါတယ်။
စိန်၊ ရွှေနဲ့ မိကျောင်းသားရေတွေ အပြည့်အစုံပါဝင်မယ့် အမြင့်ဆုံးမော်ဒယ် (Alligator Skin Gold & Diamond) အတွက်ဆိုရင်တော့ ဈေးနှုန်းဟာ အမေရိကန်ဒေါ်လာ ၃၄,၂၀၀ (မြန်မာကျပ်ငွေ သိန်း ၁,၃၀၀ ကျော်)အထိ ရှိမှာဖြစ်ပါတယ်။
Ref: gsmarena
