အမေရိကန် ပြည်ထောင်စု လတ်စ်ဗီးဂတ်စ်မှာ ကမ္ဘာ့အကြီးမားဆုံး နည်းပညာ ပြပွဲ ဖြစ်တဲ့ Consumer Electronics Show (CES) 2025 ကို ကျင်းပနေပါတယ်။ အဲဒီ ပွဲမှာ တစ်ကမ္ဘာလုံးမှ ကုမ္ပဏီတွေက ထူးခြားဆန်းသစ်တဲ့ နည်းပညာတွေကို ပြသနေကြပါတယ်။
အခုတော့ အဲဒီပွဲမှာ မီး အရမ်းပျက်တဲ့ မြန်မာနိုင်ငံနဲ့ ကိုက်တဲ့ နည်းပညာ ထုတ်ကုန် အသစ် တစ်ခုကို ပြသလိုက်ပါတယ်။ အဲဒါကတော့ နာရီ ၂၀ ကြာ သုံးနိုင်တဲ့ Solar အဲကွန်း ဖြစ်ပါတယ်။
ZERO BREEZE က Mark 3 Portable အဲကွန်းကို ပြသလိုက်ပြီး နေအိမ်ထဲမှာသာမက အပြင်သွားတဲ့အချိန်မှာလည်း ယူဆောင်သွားနိုင်ပါတယ်။ ဒီဇိုင်းက ပေါ့ပါးပြီး အရွယ်အစား သေးငယ်ပြီး မီးပျက်တဲ့ အချိန်၊ ပျော်ပွဲစားထွက်တဲ့ အချိန်မှာ အသုံးဝင်ပါတယ်။ ဘက်ထရီ ၁ လုံးနဲ့ ဆိုရင် ၇ နာရီ ကနေ ၁၀ နာရီနဲ့ ဘက်ထရီ ၂ လုံးနဲ့ဆိုရင် နာရီ ၂၀ အထိ အသုံးပြုနိုင်ပါတယ်။
အဲကွန်းမှာ အအေးမြန်စေတဲ့ “Rocket” Mode နဲ့ ညအိပ်ချိန်မှာ အသံဆူညံမှု လျော့နည်းစေတဲ့ “Sleep” Mode တွေ ထည့်သွင်းထားပါတယ်။ နေရောင်ခြည်စွမ်းအင်နဲ့ အားသွင်းနိုင်ပြီး အခြေခံမော်ဒယ်ကို ၁,၃၉၉ ဒေါ်လာနဲ့ ဘက်ထရီ ၂ လုံးပါတဲ့ မော်ဒယ်ကို ၂,၃၉၉ ဒေါ်လာ သတ်မှတ်ထားပါတယ်။ အဲကွန်းနဲ့ တွဲသုံးနိုင်တဲ့ Solar Panel ကိုလည်း ကုမ္ပဏီရဲ့ ဝက်ဘ်ဆိုက်ကနေ ရောင်းချပေးထားပါတယ်။
Ref : Tech Explorers
