Google ဟာ သူတို့ရဲ့ နောက်ဆုံးပေါ် ဗီဒီယို ဖန်တီးပေးတဲ့ AI မော်ဒယ်ဖြစ်တဲ့ Veo 3 ကို YouTube Shorts မှာ ထည့်သွင်း အသုံးပြုခွင့်ပေးတော့မှာ ဖြစ်ပါတယ်။ ဒီအစီအစဉ်ဟာ AI နဲ့ ဖန်တီးထားတဲ့ ဗီဒီယိုတွေ ပိုမိုတွင်ကျယ်လာစေဖို့ Google ရဲ့ ရည်ရွယ်ချက်ကို ပြသနေတာပါပဲ။
YouTube CEO ဖြစ်တဲ့ Neal Mohan က Veo 3 ကို ဒီနွေရာသီ နှောင်းပိုင်းမှာ YouTube Shorts အတွက် ထည့်သွင်းပေးသွားမယ်လို့ အတည်ပြု ပြောကြားခဲ့ပါတယ်။ Veo 3 ဟာ Google DeepMind ရဲ့ နောက်ဆုံးပေါ် AI ဗီဒီယို ဖန်တီးတဲ့ မော်ဒယ်ဖြစ်ပြီး စာသားတွေ (text prompts) ကနေ အရည်အသွေးမြင့်မားတဲ့၊ လက်တွေ့ဆန်တဲ့ ဗီဒီယိုတွေကို ဖန်တီးပေးနိုင်စွမ်း ရှိပါတယ်။ အမြင်ပိုင်းအပြင် အသံပိုင်း (audio) ကိုပါ ဖန်တီးပေးနိုင်တာဟာ အဓိက ထူးခြားချက်တစ်ခု ဖြစ်ပါတယ်။
လက်ရှိ YouTube မှာ Veo ရဲ့ အစောပိုင်း ဗားရှင်းကို Dream Screen feature မှာ အသုံးပြုနေတာ တွေ့ရပါတယ်။ Dream Screen က AI နဲ့ နောက်ခံပုံတွေ ဖန်တီးပေးတာဖြစ်ပေမဲ့ Veo 3 ကတော့ ဗီဒီယို အပြည့်အစုံကို ပုံရော၊ အသံရော ဖန်တီးပေးနိုင်တာမို့ အဆင့်မြင့်တဲ့ စွမ်းရည်ကို ပိုင်ဆိုင်ထားပါတယ်။
ဖန်တီးသူတွေအတွက် ဘာတွေ အကျိုးရှိမလဲ
ဒီ Veo 3 ကို YouTube Shorts မှာ ထည့်သွင်းလိုက်တာကြောင့် ဖန်တီးသူတွေဟာ စာသားအနည်းငယ်နဲ့တင် အရည်အသွေးမြင့်မားပြီး လက်တွေ့ဆန်တဲ့ ဗီဒီယိုအတိုတွေကို အလွယ်တကူ ဖန်တီးနိုင်မှာပါပဲ။ ဒါဟာ ဗီဒီယိုဖန်တီးမှု လုပ်ငန်းစဉ်ကို ပိုမို လွယ်ကူမြန်ဆန်စေပြီး အချိန်ကုန်သက်သာစေမှာ ဖြစ်ပါတယ်။ အထူးသဖြင့် ဘာသာစကားမျိုးစုံရှိတဲ့ ဒေသတွေအတွက် ကွန်တန့်ဖန်တီးရာမှာ ပိုမို အဆင်ပြေစေပါတယ်လို့ ဆိုပါတယ်။
ရှေ့ဆက်မယ့် လမ်းကြောင်း
YouTube Shorts ဟာ ၂၀၂၁ ခုနှစ်မှာ စတင်ခဲ့တာဖြစ်ပြီး လက်ရှိမှာ တစ်နေ့ကို ကြည့်ရှုမှု အကြိမ်ပေါင်း ၂၀၀ ဘီလီယံကျော် ရှိနေပါပြီတဲ့။ AI နည်းပညာတွေ ပိုမိုပါဝင်လာတာနဲ့အမျှ ဖန်တီးသူတွေအတွက် ဖန်တီးနိုင်စွမ်းတွေ ပိုမိုကျယ်ပြန့်လာမယ်လို့ Neal Mohan က ပြောကြားခဲ့ပါတယ်။ ဒါပေမဲ့ AI နဲ့ ဖန်တီးထားတဲ့ ကွန်တန့်တွေနဲ့ ပတ်သက်ပြီး မူပိုင်ခွင့်၊ ငွေရှာဖွေမှုနဲ့ ကွန်တန့်အရည်အသွေး စတဲ့ မေးခွန်းတွေလည်း ထွက်ပေါ်လာနိုင်ပါတယ်။
ဒီ Veo 3 ကို YouTube Shorts မှာ ထည့်သွင်းတာဟာ YouTube ရဲ့ ဖန်တီးမှုဆိုင်ရာ ဆန်းသစ်တီထွင်မှုမှာ အရေးကြီးတဲ့ အလှည့်အပြောင်းတစ်ခု ဖြစ်လာပါလိမ့်မယ်လို့ ဆိုပါတယ်။
Ref : gsmarena
