Samsung က ဒေါင်လိုက်ခေါက်ဖုန်း Galaxy Z Flip7 ကို ကြေညာလိုက်ပါတယ်။ မော်ဒယ်အသစ်ဟာ ခေါက်ထားချိန်မှာ ၁၃.၇ မီလီမီတာ၊ ဖြန့်ထားချိန်မှာ ၆.၅ မီလီမီတာပဲ ထူပြီး 4,300mAh ဘက်ထရီကို ထည့်သွင်းပေးထားပါတယ်။ နှိုင်းယှဉ်ကြည့်မယ်ဆိုရင် Z Flip6 က ၁၄.၉ မီလီမီတာ/၆.၉ မီလီမီတာ ထူပြီး 4,000mAh ဘက်ထရီပဲ ပါဝင်ခဲ့တာပါ။ အလေးချိန်ကတော့ ၁၈၈ ဂရမ်နဲ့ အရင်အတိုင်းနီးပါးပါပဲ။
မော်ဒယ်အသစ်ဟာ မျက်နှာပြင်တွေလည်း ပိုကြီးလာပါတယ်။ အပြင်ဘက်မျက်နှာပြင်ဟာ အခုဆိုရင် ဘေးဘောင်လုံးဝမရှိသလောက်ဖြစ်သွားပြီး ၄.၁ လက်မအရွယ် Super AMOLED မျက်နှာပြင် (1,048 x 948px, 120Hz) ဖြစ်လာပါတယ်။ သူ့ကို ဘယ် Galaxy ဖုန်းမှာမှမရှိဖူးတဲ့ ၁.၂၅ မီလီမီတာပဲထူတဲ့ အပါးလွှာဆုံး ဘေးဘောင်တွေနဲ့ ဝန်းရံထားပါတယ်။ ဒါဟာ မော်ဒယ်အဟောင်းက ၃.၄ လက်မ မျက်နှာပြင်ထက် သိသိသာသာ ပိုကြီးလာတာ ဖြစ်ပါတယ်။
အပြင်ဘက်မျက်နှာပြင်မှာ Vision Booster စနစ်ပါဝင်ပြီး အပြင်ဘက်မှာ ကောင်းကောင်းမြင်ရဖို့ အလင်းအား 2,600 nits အထိ ရနိုင်ပါတယ်။ Google Gemini AI လက်ထောက်နဲ့ Now Bar ကိုလည်း FlexWindow လို့ခေါ်တဲ့ အပြင်ဘက်မျက်နှာပြင်ပေါ်မှာ အသုံးပြုနိုင်ပါပြီ။ ဒါ့အပြင်၊ ကုမ္ပဏီကထုတ်တဲ့ app တွေရော၊ တခြား developer တွေရဲ့ app တွေကိုပါ အပြင်ဘက်မျက်နှာပြင်ပေါ်မှာ ပိုပြီးသုံးနိုင်လာသလို၊ စိတ်ကြိုက်ပြင်ဆင်နိုင်တဲ့ ရွေးချယ်စရာတွေလည်း ပိုများလာပါတယ်။
အတွင်းဘက်မျက်နှာပြင်ကလည်း ပိုကြီးလာပြီး အရင် ၆.၇ လက်မကနေ အခု ၆.၉ လက်မအထိ ကျယ်လာပါတယ်။ Samsung ရဲ့အဆိုအရ ဒီအရွယ်အစားဟာ Galaxy S25+ ရဲ့ မျက်နှာပြင်နဲ့ ဆင်တူတယ်လို့ ဆိုပါတယ်။ (Z Flip7 ရဲ့ မျက်နှာပြင်အကျယ်က ၆၈.၆ မီလီမီတာဖြစ်ပြီး S25+ ကတော့ ၇၀.၈ မီလီမီတာ ရှိပါတယ်)။ ဒါပေမဲ့ ခေါက်လိုက်တဲ့အခါမှာတော့ Flip က ပိုပြီး ကျစ်လစ်နေမှာပါ။
Samsung အင်ဂျင်နီယာတွေအတွက်တော့ Galaxy Z Flip7 ကို ပိုပါးအောင်လုပ်ဖို့ ကြိုးစားခဲ့ရချိန်မှာ စိန်ခေါ်မှုကြီးတစ်ခု ဖြစ်ခဲ့ပါတယ်။ သူတို့ဟာ အတွင်းပိုင်းအစိတ်အပိုင်းတွေကို ပိုပါးအောင်လုပ်ပြီး တခြား Galaxy ဖုန်းတွေထက် ပိုပြီးကျစ်ကျစ်လစ်လစ် ထည့်သွင်းခဲ့ရပါတယ်။ Armor FlexHinge အသစ်က အရင်ကထက် ၃၀% ပိုပါးသွားပါတယ်။
စိတ်ဝင်စားစရာကောင်းတာက Samsung ဟာ ဘေးဘောင်တွေကို လုံအောင်ပိတ်ဖို့ ကြိုးစားမယ့်အစား အတွင်းပိုင်းအစိတ်အပိုင်းတွေကို ရေလုံအောင် ပြုလုပ်ထားတာပါပဲ။ ဖုန်းရဲ့အပြင်ဘက်ကိုယ်ထည်ကို Gorilla Glass Victus 2 နဲ့ ပြုလုပ်ထားပြီး ဘေးဘောင်ကိုတော့ Armor Aluminum နဲ့ ပြုလုပ်ထားပါတယ်။ Z Flip7 ဟာ ဖုန်နဲ့ရေဒဏ်ကို ခံနိုင်တဲ့ IP48 အဆင့် သတ်မှတ်ချက် ရရှိထားပါတယ်။
မနှစ်ကနဲ့ မတူတော့တဲ့ နောက်တစ်ချက်ကတော့ chipset ဖြစ်ပြီး ဒီဖုန်းမှာ 3nm နည်းပညာနဲ့ထုတ်လုပ်ထားတဲ့ Exynos 2500 အသစ်ကို အသုံးပြုထားပါတယ်။ ဒီ chip ကို RAM 12GB နဲ့ storage 256GB ဒါမှမဟုတ် 512GB တို့နဲ့ တွဲဖက်ပေးထားပါတယ်။ ဒီတစ်ခါတော့ မြောက်အမေရိကဈေးကွက်အတွက် Snapdragon အမျိုးအစား ထုတ်လုပ်မှာ မဟုတ်ပါဘူး။
Exynos 2500 ဟာ မနှစ်က Snapdragon ထက် ပိုပြီးစွမ်းအင်သုံးစွဲမှု သက်သာတာကြောင့် တစ်ခါအားသွင်းထားရုံနဲ့ ဗီဒီယိုကြည့်မယ်ဆိုရင် ၃၁ နာရီအထိ ခံနိုင်မယ်လို့ ဆိုပါတယ်။ ဒါက ဘက်ထရီပိုကြီးလာတာကြောင့်လည်း ပါပါတယ်။ ဖုန်းမှာ 25W ကြိုးတပ်အားသွင်းစနစ် (မိနစ် ၃၀ အတွင်း အား ၅၀% ပြည့်) နဲ့ ကြိုးမဲ့အားသွင်းစနစ်တွေလည်း ပါဝင်ပါတယ်။
ကင်မရာပိုင်းမှာတော့ 50MP ပင်မကင်မရာ (f/1.8, OIS) နဲ့ 12MP ultra-wide ကင်မရာတို့ ပါဝင်ပါတယ်။ ဒီကင်မရာတွေကို ဆယ်လ်ဖီရိုက်ဖို့ သုံးနိုင်သလို၊ အတွင်းဘက်မျက်နှာပြင်ပေါ်က 10MP ကင်မရာကိုလည်း သုံးနိုင်ပါတယ်။ သီးသန့် telephoto မှန်ဘီလူး မပါဝင်ပေမယ့် 50MP ပင်မကင်မရာကနေ “optical quality” (မှန်ဘီလူးနဲ့ဆွဲထားသလို အရည်အသွေး) ရှိတဲ့ 2x zoom ကို ရိုက်ကူးနိုင်တယ်လို့ Samsung က ပြောပါတယ်။
Samsung Galaxy Z Flip7 ကို Blue Shadow, Jet Black နဲ့ Coral Red ဆိုတဲ့အရောင်တွေအပြင် အွန်လိုင်းမှာပဲသီးသန့်ရောင်းချမယ့် Mint အရောင်နဲ့ပါ ရရှိနိုင်မှာပါ။ ဈေးနှုန်းအသေးစိတ်ကိုတော့ အောက်မှာ ဆက်လက်ဖော်ပြသွားမှာပါ။
Samsung Galaxy Z Flip7 ကို ဒီနေ့ပဲ ကြိုတင်မှာယူလို့ရနေပြီဖြစ်ပြီး ဇူလိုင်လ ၂၅ ရက်နေ့ကစပြီး ရောင်းချသွားမှာ ဖြစ်ပါတယ်။ Flip ဖုန်းအသစ်ဝယ်ယူသူတိုင်းအတွက် 2TB cloud storage ပါဝင်တဲ့ Google AI Pro plan ကို ၆ လစာ အခမဲ့ ရရှိမယ့် အခွင့်အရေးလည်း ရှိပါတယ်။
Ref: gsmarena
