အနာဂတ်ရဲ့ စမတ်မြို့တော်အဖြစ် အသွင်ပြောင်းဖို့ ကြိုးပမ်းနေတဲ့ ဒူဘိုင်းမြို့ရဲ့ အထင်ကရ ကမ်းခြေတွေနဲ့ ပန်းခြံတွေမှာတော့ ထူးခြားတဲ့ အုန်းပင်တွေကို အများအပြား စိုက်ထူထားပါတယ်။ အနီးကပ်ကြည့်လိုက်တဲ့အခါမှာတော့ ဒါတွေဟာ တကယ့်အပင်တွေမဟုတ်ဘဲ နည်းပညာအပြည့်နဲ့ တည်ဆောက်ထားတဲ့ “စမတ်အုန်းပင် (Smart Palms)” တွေ ဖြစ်နေတာကို တွေ့ရမှာပါ။
ဒီစမတ်အုန်းပင်တွေက အသီးတွေ မသီးပေမယ့်၊ မြို့ခံတွေနဲ့ ကမ္ဘာလှည့်ခရီးသွားတွေအတွက် အဖိုးတန်တဲ့ ဝန်ဆောင်မှုတွေကို ပေးနေပါတယ်။ အဓိကအားဖြင့် အင်တာနက်သုံးစွဲသူတွေအတွက် အခမဲ့ Wi-Fi ကို လွှင့်ပေးထားပြီး၊ ပူပြင်းတဲ့ရာသီဥတုအောက်မှာ မိုဘိုင်းဖုန်းဘက်ထရီကုန်မှာ မစိုးရိမ်ရအောင် အမြန်အားသွင်းနိုင်တဲ့ USB ပေါက်များစွာကိုလည်း ထည့်သွင်းပေးထားပါတယ်။ ဒါ့အပြင် အပန်းဖြေအနားယူနိုင်ဖို့ သက်သောင့်သက်သာရှိတဲ့ အရိပ်ရခုံတွေကိုပါ တပါတည်း တည်ဆောက်ထားပါတယ်။
ဒီစမတ်အုန်းပင်တွေရဲ့ အဓိကထူးခြားချက်ကတော့ လိုအပ်တဲ့စွမ်းအင်အားလုံးကို သူ့ရဲ့အုန်းလက်ပုံစံ ဆိုလာပြားတွေကနေတစ်ဆင့် နေရောင်ခြည်ကနေပဲ ရယူအသုံးပြုထားတာပါ။ ဒါကြောင့် သဘာဝပတ်ဝန်းကျင်ကို မထိခိုက်စေတဲ့ ရေရှည်တည်တံ့ခိုင်မြဲတဲ့ နည်းပညာတစ်ခုလည်း ဖြစ်ပါတယ်။
ဒါတွေအပြင်၊ အုန်းပင်ရဲ့ ပင်စည်မှာ ဒေသဆိုင်ရာအချက်အလက်တွေ၊ မြေပုံတွေနဲ့ ကြော်ငြာတွေကို ကြည့်ရှုနိုင်မယ့် Touchscreen မျက်နှာပြင်တွေ တပ်ဆင်ထားပါသေးတယ်။ လုံခြုံရေးအတွက်လည်း အဆင့်မြင့် စောင့်ကြည့်ကင်မရာတွေနဲ့ အရေးပေါ်အခြေအနေမှာ အကူအညီတောင်းနိုင်မယ့် ခလုတ်တွေကိုပါ ထည့်သွင်းထားတာကြောင့် အများပြည်သူအပန်းဖြေနေရာတွေရဲ့ လုံခြုံရေးကို ပိုပြီးစိတ်ချရစေပါတယ်။
ဒီစီမံကိန်းဟာ ဒူဘိုင်းမြို့ရဲ့ “Smart Dubai” ဆိုတဲ့ ရည်မှန်းချက်ကို အကောင်အထည်ဖော်ရာမှာ အရေးပါတဲ့ ခြေလှမ်းတစ်ခုဖြစ်ပြီး၊ နည်းပညာကို လူနေမှုဘဝနဲ့ ပေါင်းစပ်ပြီး မြို့ပြနေထိုင်သူတွေရဲ့ အတွေ့အကြုံကို ဘယ်လိုမြှင့်တင်ပေးနိုင်လဲဆိုတာကို ပြသနေတဲ့ စံပြဥပမာတစ်ခုလည်း ဖြစ်ပါတယ်။
Ref : upgrader
