ဂျာမနီနိုင်ငံမှာ စက်တင်ဘာလ ၇ ရက်နေ့က ကြေကွဲဖွယ်ရာ ကားမတော်တဆမှုတစ်ခု ဖြစ်ပွားခဲ့ပါတယ်။ Tesla ကားတစ်စီး လမ်းဘေးကိုထိုးကျပြီး သစ်ပင်ဝင်တိုက်ကာ မီးလောင်ကျွမ်းခဲ့တာကြောင့် အသက် ၄၃ နှစ်အရွယ် အမျိုးသားတစ်ဦးနဲ့ အသက် ၉ နှစ်အရွယ် ကလေးငယ်နှစ်ဦး သေဆုံးခဲ့ပါတယ်။ အသက် ၉ နှစ်အရွယ် တတိယမြောက်ကလေးတစ်ဦးကတော့ ဒဏ်ရာတွေနဲ့ အသက်ရှင်လွတ်မြောက်ခဲ့ပြီး ဆေးရုံကို ရဟတ်ယာဉ်နဲ့ ပို့ဆောင်ခဲ့ရပါတယ်။
အနီးအနားက ဆိုင်ပိုင်ရှင်တစ်ဦးက မီးသတ်ဆေးဘူးနဲ့ အပြေးအလွှားလာရောက် ကူညီခဲ့ပေမဲ့ ကားရဲ့ အီလက်ထရောနစ် တံခါးတွေကို ဖွင့်လို့မရခဲ့ပါဘူး။ မတော်တဆမှုကြောင့် ကားရဲ့ ပါဝါလိုင်းတွေ ပြတ်တောက်သွားပြီးနောက် တံခါးတွေက အလိုအလျောက်ပွင့်မလာခဲ့ဘူးလို့ ဆိုပါတယ်။
မီးသတ်သမားတွေက မီးကို အကြိမ်ကြိမ်ငြှိမ်းသတ်ခဲ့ရပြီးနောက် ကားထဲမှာ မီးလောင်ကျွမ်းပြီး သေဆုံးနေတဲ့သူတွေကို တွေ့ရှိခဲ့ရပါတယ်။
ရဲတပ်ဖွဲ့က မတော်တဆမှုဖြစ်ရတဲ့ အကြောင်းရင်းနဲ့ ကားရဲ့ အီလက်ထရောနစ်တံခါးတွေ အပါအဝင် ယာဉ်စနစ်တွေရဲ့ ချို့ယွင်းမှုက ဒီဖြစ်ရပ်မှာ အဓိကကျခဲ့သလားဆိုတာကိုပါ စုံစမ်းစစ်ဆေးနေပါတယ်။
Ref : Technology Innovation
