iPhone 4 တစ်လုံးဝယ်ဖို့ ကျောက်ကပ်ရောင်းခဲ့တဲ့ တရုတ်အမျိုးသားတစ်ယောက်ရဲ့ ဇာတ်လမ်းဟာ အခုအခါမှာ ပြန်လည်ပေါ်ထွက်လာခဲ့ပါတယ်။ အသက် ၃၁ နှစ်အရွယ်ရောက်နေပြီဖြစ်တဲ့ သူဟာ အခုချိန်မှာ အလုပ်မလုပ်နိုင်တော့တဲ့ မသန်စွမ်းတစ်ယောက်အဖြစ် တစ်သက်တာလုံး ကျောက်ကပ်ဆေးနေရပါတယ်။ ဒါဟာ အသက် ၁၇ နှစ်အရွယ်က ပြုလုပ်ခဲ့တဲ့ ဆုံးဖြတ်ချက်မှားတစ်ခုရဲ့ ပြင်းထန်တဲ့အကျိုးဆက်ဖြစ်ပါတယ်။
၂၀၁၀ ခုနှစ်တုန်းက iPhone 4 ဟာ တရုတ်နိုင်ငံက ဆယ်ကျော်သက်တွေကြားမှာ ခေတ်မီခြင်းရဲ့ သင်္ကေတတစ်ခု ဖြစ်ခဲ့ပါတယ်။ အဲဒီအချိန်က အသက် ၁၇ နှစ်အရွယ်သာရှိသေးတဲ့ Anhui ပြည်နယ်က ဆင်းရဲတဲ့မိသားစုက Wang Shangkun ဟာ အဲဒီရေစီးကြောင်းမှာ ပါဝင်သွားခဲ့ပါတယ်။ ဒါပေမယ့် ပိုက်ဆံမတတ်နိုင်တဲ့အတွက် သူလိုချင်တဲ့ဖုန်းကို မဝယ်နိုင်ခဲ့ပါဘူး။ လူမှုကွန်ရက်သုံးရင်း ကျောက်ကပ်ရောင်းဖို့ အကြံပေးတဲ့စာကိုတွေ့ပြီး မိသားစုကို အသိမပေးဘဲ လူမှောင်ခိုအဖွဲ့နဲ့ ဆက်သွယ်ခဲ့ကာ ၂၀,၀၀၀ ယွမ်နဲ့ သူ့ရဲ့ကျောက်ကပ်တစ်ခြမ်းကို ရောင်းထုတ်ခဲ့ပါတယ်။
ခွဲစိတ်မှုလုပ်ပြီးနောက်မှာ သူဟာ iPhone 4 နဲ့ iPad 2 တို့ကို ဝယ်ယူခဲ့ပြီး အိမ်ပြန်ရောက်ချိန်မှာ သူ့မိခင်က သံသယဝင်ခဲ့ပါတယ်။ နောက်ဆုံးမှာတော့ သူအမှန်အတိုင်း ဝန်ခံခဲ့ချိန်မှာ သူ့မိခင်အတွက် ကမ္ဘာပျက်သလို ခံစားခဲ့ရတယ်လို့ ဆိုပါတယ်။ ခွဲစိတ်မှုပြုလုပ်ခဲ့တဲ့နေရာဟာ မသန့်ရှင်းတာကြောင့် မကြာခင်မှာပဲ သူ့မှာ ပြင်းထန်တဲ့ ပိုးဝင်မှုတွေဖြစ်ပွားခဲ့ပြီး ကျန်ရှိတဲ့ကျောက်ကပ်တစ်ခြမ်းကလည်း ကောင်းကောင်းအလုပ်မလုပ်နိုင်တော့ပါဘူး။ နောက်ပိုင်းမှာ အာဏာပိုင်တွေက အဲဒီမှောင်ခိုအဖွဲ့ကို ဖမ်းဆီးနိုင်ခဲ့ပြီး သူ့မိသားစုကို လျော်ကြေးငွေ ယွမ် ၁.၄၈ သန်းကျော် ပေးဖို့ အမိန့်ချခဲ့ပေမယ့် သူ့ရဲ့ကံကြမ္မာကိုတော့ ပြောင်းလဲနိုင်ခဲ့ခြင်း မရှိပါဘူး။
အခုအခါမှာ အသက် ၃၁ နှစ်ရှိပြီဖြစ်တဲ့ Wang ဟာ ကျောက်ကပ်ရဲ့ လုပ်ဆောင်နိုင်စွမ်း ၇၅% ဆုံးရှုံးသွားပြီး အဆင့် ၃ မသန်စွမ်းအဖြစ် သတ်မှတ်ခံထားရကာ ဘယ်လိုအလုပ်မျိုးမှ မလုပ်နိုင်တော့ပါဘူး။ သူက သူ့ရဲ့လုပ်ရပ်ဟာ သူများတွေထက် မနိမ့်ကျချင်တဲ့စိတ်ကြောင့် ဖြစ်ခဲ့ပြီး သူ့ဘဝရဲ့ “အကြီးမားဆုံး နောင်တ” ဖြစ်တယ်လို့ ဝန်ခံပြောကြားခဲ့ပါတယ်။ သူ့ရဲ့မိခင်ကလည်း “အဲဒီတုန်းကသာ သူ့ကို ဖုန်းတစ်လုံးဝယ်ပေးခဲ့ရင် သူ ဒီလမ်းကို ရွေးခဲ့မှာ မဟုတ်လောက်ဘူး” လို့ ဝမ်းနည်းစွာနဲ့ ပြောကြားခဲ့ပါတယ်။
Ref: Thethaiger
