ကမ္ဘာ့နေရာတော်တော်များများမှာ 5G ကွန်ရက်လွှမ်းခြုံမှု အပြည့်အဝရဖို့ ကြိုးစားနေကြတုန်း ရှိသေးပေမယ့် Samsung နဲ့ SK Telecom တို့ကတော့ နောက်တစ်ဆင့်ဖြစ်တဲ့ 6G နည်းပညာဘက်ကို အားသွန်ခွန်စိုက် ဦးတည်နေကြပါပြီ။
ကိုရီးယား နည်းပညာ ကုမ္ပဏီကြီးနှစ်ခုဟာ AI နည်းပညာကို အဓိကအခြေခံပြီး ကွန်ရက်တွေကို စီမံခန့်ခွဲသွားမယ့် 6G နည်းပညာတွေ ပူးပေါင်းတီထွင်ဖို့ သဘောတူညီချက်အသစ်တစ်ခု လက်မှတ်ရေးထိုးလိုက်ကြပါတယ်။
ဒီပူးပေါင်းမှုကတော့ အနာဂတ် ရေဒီယိုကွန်ရက်တွေကို ပတ်ဝန်းကျင်အခြေအနေအလိုက် အလိုအလျောက် ချိန်ညှိနိုင်မယ့် ဉာဏ်ရည်မြင့်စနစ်တွေအဖြစ် ပြောင်းလဲပစ်ဖို့ပဲ ဖြစ်ပါတယ်။
6G ကွန်ရက်မှာ AI က ဘာတွေလုပ်ပေးမှာလဲဆိုရင် အဓိက အချက် ၃ ချက် ရှိပါတယ်။ ပထမအချက်က အချက်ပြလှိုင်းတွေ ပုံပျက်တာကို သုံးစွဲသူတွေ မသိလိုက်ခင် ကြိုတင်ခန့်မှန်းပြီး ပြုပြင်ပေးမယ့် AI-based channel estimation စနစ်၊ ဒုတိယအချက်က နေရာစုံက အင်တင်နာတွေကို တစ်သီးတစ်ခြားစီ မဟုတ်ဘဲ ပေါင်းစပ်လုပ်ဆောင်စေပြီး ပိုမိုကျယ်ပြန့်တဲ့ လွှမ်းခြုံမှုပေးမယ့် Distributed MIMO စနစ်နဲ့ နောက်ဆုံးအချက်ကတော့ ကွန်ရက်တွေ ကျပ်တဲ့အခါ ဒေတာတွေကို ဘယ်လိုပို့မလဲဆိုတာ ဉာဏ်ရည်ထက်မြက်စွာ ဆုံးဖြတ်ပေးမယ့် AI-driven scheduling စနစ်တွေပဲ ဖြစ်ပါတယ်။
Samsung အနေနဲ့ 6G အတွက် ၂၀၁၉ ခုနှစ်ကတည်းက အခြေခံအုတ်မြစ်တွေ ချထားခဲ့တာဖြစ်ပြီး SK Telecom ဘက်ကလည်း တောင်ကိုရီးယားနိုင်ငံအတွင်းမှာ လက်တွေ့စမ်းသပ်နိုင်မယ့် ကြီးမားတဲ့ ပတ်ဝန်းကျင်တစ်ခုကို ပိုင်ဆိုင်ထားပါတယ်။ ကုမ္ပဏီနှစ်ခုစလုံးဟာ ဒီနည်းပညာသစ်ကို စံနှုန်းသတ်မှတ်ဖို့ ကြိုးပမ်းနေတဲ့ ကမ္ဘာလုံးဆိုင်ရာ AI-RAN Alliance အဖွဲ့ဝင်တွေလည်း ဖြစ်ကြပါတယ်။
သူတို့ရဲ့ အဆိုပြုချက်တစ်ခုဖြစ်တဲ့ AI အသုံးပြု Channel estimation နည်းပညာကို တရားဝင် လုပ်ငန်းစဉ်အဖြစ် လက်ခံအတည်ပြုထားပြီးဖြစ်သလို ကနဦး သုတေသနရလဒ်တွေကိုလည်း ဒီလအတွင်းမှာ ပြသခဲ့ပြီး ဖြစ်ပါတယ်။
စီးပွားဖြစ် 6G ကွန်ရက်ကို ၂၀၂၈ ခုနှစ်လောက်မှ စတင်အသုံးပြုနိုင်မယ်လို့ ခန့်မှန်းရပေမယ့် ဒီပူးပေါင်းဆောင်ရွက်မှုကတော့ အဲဒီအချိန်ရောက်ရင် ကွန်ရက်တွေဟာ လက်ရှိထက် ပိုမိုဉာဏ်ရည်ထက်မြက်နေစေဖို့ ရည်ရွယ်ပါတယ်။ Samsung နဲ့ SKT တို့ဟာ သီအိုရီအရ မြန်နှုန်းမြင့်တာတစ်ခုတည်းကိုပဲ လိုက်နေတာမျိုး မဟုတ်ဘဲ လူထူထပ်တဲ့ အားကစားကွင်းတွေနဲ့ ရုံးခန်းအဆောက်အအုံတွေလိုမျိုး 5G အဆင်မပြေတဲ့ နေရာတွေမှာပါ အသုံးပြုရ အဆင်ပြေစေဖို့ မျှော်မှန်းထားပါတယ်။
တကယ်လို့သာ သူတို့မျှော်မှန်းထားတဲ့အတိုင်း ဖြစ်လာခဲ့ရင် ဖုန်းမျက်နှာပြင်ပေါ်မှာ ဘယ် “G” ပေါ်နေလဲဆိုတာတောင် ဂရုစိုက်စရာ မလိုတော့ဘဲ အင်တာနက်လိုင်း အမြဲကောင်းနေမယ့် အခြေအနေတစ်ခုကို ရရှိလာနိုင်မှာပဲ ဖြစ်ပါတယ်။
ref: gizmochina
