ကားထုတ်လုပ်တဲ့နေရာမှာ နာမည်ကြီးတဲ့ တရုတ်ကုမ္ပဏီကြီး BYD ဟာ အခုဆိုရင် စက်ရုပ်နည်းပညာလောကထဲကိုပါ ခြေလှမ်းစတင်လိုက်ပါပြီ။ သူတို့ရဲ့ ပထမဆုံး လူတူစက်ရုပ်ဖြစ်တဲ့ Xiao Di ကို တရုတ်နိုင်ငံ ကျန်းကျိုးမြို့မှာရှိတဲ့ Di Space အတွေ့အကြုံစင်တာမှာ စိတ်ဝင်စားဖွယ် မိတ်ဆက်လိုက်ပါတယ်။ အဲဒီစက်ရုပ်ဟာ အရပ် ၅ ဒသမ ၂ ပေ၊ အလေးချိန် ၁၂၉ ပေါင်ရှိပြီး လူတွေလို သဘာဝကျကျ လှုပ်ရှားနိုင်တဲ့ အဆစ် ၃၁ ခုအထိ ပါဝင်တယ်လို့ သိရပါတယ်။
ဖောက်သည်တွေကို ဝန်ဆောင်မှုပေးဖို့ အထူးထုတ်လုပ်ထားတဲ့ Xiao Di ဟာ ဧည့်သည်တွေကို ဖော်ဖော်ရွေရွေ နှုတ်ဆက်နိုင်ရုံသာမက BYD ကားတွေရဲ့ အဆင့်မြင့်လုပ်ဆောင်ချက်တွေကိုပါ အသေးစိတ် ရှင်းပြပေးနိုင်ပါတယ်။ ပိုပြီး အံ့ဩစရာကောင်းတာက ၃၆၀ ဒီဂရီ မြင်ကွင်းကို မြင်နိုင်စွမ်းရှိတာ၊ လူတွေရဲ့ မျက်နှာနဲ့ လက်ဟန်အမူအရာတွေကို ခွဲခြားသိမြင်နိုင်တာအပြင် တရုတ်ဒေသန္တရစကား ၆ မျိုးနဲ့ နိုင်ငံခြားဘာသာစကား ၆ မျိုးကို အချိန်တပြေးညီ တိုက်ရိုက် ဘာသာပြန်ဆိုပေးနိုင်တာပဲ ဖြစ်ပါတယ်။
ရှေ့ဆက်ပြီးတော့လည်း BYD ကုမ္ပဏီဟာ သူတို့ရဲ့ ကားအရောင်းပြခန်းတိုင်းမှာ အဲဒီစက်ရုပ် ၂ ရုပ် ဒါမှမဟုတ် ၃ ရုပ်အထိ ထားရှိဖို့ ရည်မှန်းထားပြီး ကုန်တိုက်တွေနဲ့ ကုန်လှောင်ရုံတွေမှာပါ အသုံးပြုနိုင်ဖို့ စမ်းသပ်လေ့လာနေပါတယ်။ အခုလို လူတူစက်ရုပ်ကို အောင်မြင်စွာ ထုတ်လုပ်နိုင်ခဲ့တဲ့အတွက် BYD ဟာ Tesla နဲ့ XPeng တို့ကို စိန်ခေါ်တော့မှာ ဖြစ်ပါတယ်။
Ref : Technology Innovation
