ညဘက် မှောင်မိုက်နေတဲ့အချိန်မှာ ကမ္ဘာပေါ်ကို နေရောင်ခြည် ပြန်လည်ရောင်ပြန်ဟပ်ပေးမယ့် ဂြိုဟ်တုစမ်းသပ်မှုကို အမေရိကန် ဖက်ဒရယ် ဆက်သွယ်ရေး ကော်မရှင် (FCC) က ခွင့်ပြုလိုက်ပါတယ်။ Reflect Orbital နည်းပညာကုမ္ပဏီက တီထွင်ထားတဲ့ Eärendil-1 ဂြိုဟ်တုဟာ ကမ္ဘာ့ပတ်လမ်းကြောင်းအနိမ့်ကနေ ပေ ၆၀ ပတ်လည်ရှိတဲ့ မှန်ချပ်ကြီးကို အသုံးပြုပြီး မြေပြင်ပေါ်ကို ၃ မိုင်ခန့် ကျယ်ဝန်းတဲ့ နေရောင်ခြည်အလင်းတန်း ဖြန်းပေးသွားမှာပါ။ ဒီနည်းပညာ အောင်မြင်ခဲ့ရင် ညဘက်မှာ ဆိုလာစွမ်းအင် ဆက်လက်ထုတ်လုပ်နိုင်မှာဖြစ်သလို စိုက်ပျိုးရေးနဲ့ အရေးပေါ် အလင်းရောင်ပေးတဲ့ လုပ်ငန်းတွေမှာပါ တော်လှန်ပြောင်းလဲမှုတွေ ဖြစ်လာနိုင်ပါတယ်။
ဒါပေမဲ့ ဒီစမ်းသပ်မှုအပေါ် နက္ခတ္တဗေဒ ပညာရှင်တွေကတော့ တော်တော်လေး စိုးရိမ်နေကြပါတယ်။ ကောင်းကင်ယံကနေ အလင်းရောင် ရောင်ပြန်ဟပ်တာဟာ အလင်းညစ်ညမ်းမှုကို ဖြစ်ပေါ်စေပြီး အာကာသ လေ့လာစောင့်ကြည့်မှုတွေကို ကြီးကြီးမားမား အနှောင့်အယှက်ပေးနိုင်တယ်လို့ အမေရိကန် နက္ခတ္တဗေဒ အသင်း (AAS) က သတိပေးထားတာပါ။ ဥရောပ တောင်ပိုင်း လေ့လာစောင့်ကြည့်ရေး အဖွဲ့ (ESO) ရဲ့ လေ့လာချက်အရဆိုရင် ဒီဂြိုဟ်တုက လာမယ့်အလင်းဟာ လရောင်ထက်တောင် ပိုမိုတောက်ပနေနိုင်တယ်လို့ ဆိုပါတယ်။ ခွင့်ပြုချက်ထုတ်ပေးခဲ့တဲ့ FCC ကတော့ အလင်းညစ်ညမ်းမှုဆိုင်ရာ ကိစ္စတွေဟာ သူတို့ရဲ့ လုပ်ပိုင်ခွင့်အတိုင်းအတာထဲ မပါဝင်ဘူးလို့ ငြင်းဆိုထားပါတယ်။
လက်ရှိမှာတော့ ဒီစီမံကိန်းဟာ စမ်းသပ်ဆဲအဆင့်မှာပဲ ရှိသေးတာကြောင့် စီးပွားဖြစ် နေရောင်ခြည် ပေးဝေနိုင်ခြင်း မရှိသေးပါဘူး။ အနာဂတ်မှာ ပြုလုပ်မယ့် စမ်းသပ်မှုတွေကမှ ဒီနည်းပညာဟာ လက်တွေ့ တကယ် အသုံးချလို့ ရမရနဲ့ ညကောင်းကင်ယံအပေါ် သက်ရောက်မယ့် အလင်းညစ်ညမ်းမှုတွေကို ဘယ်လောက်အထိ လျှော့ချပေးနိုင်မလဲဆိုတာကို အဖြေထုတ်ပေးသွားမှာ ဖြစ်ပါတယ်။
Ref : Technology Innovation
