SpaceX ဟာ တနင်္ဂနွေနေ့က ဂြိုလ်တု ၅၆ လုံးကို အောင်မြင်စွာ ထပ်မံလွှတ်တင်ခဲ့ပြီးနောက်၊ Starlink ဂြိုလ်တု စုစုပေါင်း အလုံး ၁၀,၀၀၀ မြောက်ကို ကမ္ဘာပတ်လမ်းထဲ လွှတ်တင်နိုင်ခဲ့ပါတယ်။ ဒါကြောင့် SpaceX ရဲ့ သူဌေး Elon Musk ဟာ အခုဆိုရင် ကမ္ဘာ့ပတ်လမ်းထဲက ဂြိုလ်တုအားလုံးရဲ့ သုံးပုံနှစ်ပုံ (၆၆ ရာခိုင်နှုန်း) ကို ထိန်းချုပ်ထားပြီ ဖြစ်တယ်လို့ ဂြိုလ်တုတွေကို ခြေရာခံနေတဲ့ အကျိုးအမြတ်မယူတဲ့အဖွဲ့ Celestrak ရဲ့ အချက်အလက်တွေအရ သိရပါတယ်။ အောက်တိုဘာ ၂၀ ရက်နေ့အထိ ကမ္ဘာပတ်လမ်းနိမ့်မှာရှိတဲ့ ဂြိုလ်တု စုစုပေါင်း ၁၂,၉၅၅ လုံးထဲက ၈,၅၆၂ လုံးဟာ Starlink တွေ ဖြစ်နေပါတယ်။
Musk ရဲ့ ဒီလို လွှမ်းမိုးထားနိုင်မှုက စိုးရိမ်မှုတွေကို မြင့်တက်စေပါတယ်။ SpaceX ဟာ Starlink ကွန်ရက်ကို ဂြိုလ်တုပေါင်း ၄၂,၀၀၀ အထိ တည်ဆောက်ဖို့ မျှော်မှန်းထားပေမဲ့၊ လက်ရှိမှာတော့ အလုံး ၁၂,၀၀၀ လွှတ်တင်ဖို့ပဲ ခွင့်ပြုချက် ရထားပါသေးတယ်။ ပြိုင်ဘက်တွေအနေနဲ့ OneWeb က ဂြိုလ်တု ၆၅၁ လုံး လည်ပတ်နေပြီး၊ တရုတ်နိုင်ငံက ကတော့ ၂၀၃၀ ပြည့်လွန်နှစ်တွေမှာ ဂြိုလ်တု ၁၀,၀၀၀ ကျော် ပတ်လမ်းထဲ ပို့ဆောင်ဖို့ ရည်မှန်းထားပါတယ်။
ကမ္ဘာမြေပေါ်ကို အင်တာနက်မြန်နှုန်းမြင့် ထုတ်လွှင့်ပေးတဲ့ အဲဒီ Starlink ဂြိုလ်တုတွေဟာ ငါးနှစ်ဝန်းကျင်လောက်ပဲ သက်တမ်းခံအောင် တည်ဆောက်ထားတာပါ။ အဲဒီနောက်မှာတော့ သူတို့ဟာ လေထုထဲကို ပြန်လည်ဝင်ရောက်ကာ လုံးဝလောင်ကျွမ်း ပျက်စီးသွားကြပါတယ်။ ၂၀၂၅ ခုနှစ်ထဲမှာ နေ့စဉ် Starlink ဂြိုလ်တု တစ်လုံးကနေ နှစ်လုံးကြား ပျက်စီးကျဆင်းနေတယ်လို့ နက္ခတ္တဗေဒပညာရှင် Jonathan McDowell က မှတ်တမ်းတင်ထားပြီး၊ မကြာသေးခင်ကလည်း အဲဒီအပျက်အစီးတွေ မီးလောင်နေတဲ့ ဗီဒီယိုတွေ လူမှုကွန်ရက်မှာ ပေါ်ထွက်လာခဲ့ပါတယ်။
ဂြိုလ်တုကွန်ရက် ဆက်လက်ကြီးထွားလာတာနဲ့အမျှ ဒီလို ပျက်စီးကျဆင်းတဲ့နှုန်းဟာ တစ်နေ့ကို ၅ လုံးလောက်အထိ မြင့်တက်လာမယ်လို့ ခန့်မှန်းရပါတယ်။ ဒီအပျက်အစီးတွေက မြေပြင်ပေါ်က လူတွေအတွက် အန္တရာယ်မရှိပေမဲ့၊ အဲဒီလို မီးလောင်ကျွမ်းမှုတွေကနေ ထွက်လာတဲ့ ညစ်ညမ်းစေတဲ့အရာတွေက လေထုကို ပျက်စီးစေပြီး ကမ္ဘာကြီးပူနွေးမှုကို အထောက်အကူ ဖြစ်စေနိုင်တယ်လို့ Dr. McDowell က သတိပေးထားပါတယ်။ ဒီအကျိုးသက်ရောက်မှုတွေက တကယ်တမ်း ပြဿနာကြီးကြီးမားမား ဖြစ်စေလောက်အောင် ဆိုးရွားမလားဆိုတာ မရှင်းလင်းသေးပေမဲ့၊ ပြဿနာမဖြစ်ဘူးလို့တော့ အတိအကျ ပြောလို့မရသေးပါဘူး။
Ref : independent
