တရုတ်နည်းပညာကုမ္ပဏီကြီး Alibaba ဟာ ပြိုင်ဆိုင်မှုပြင်းထန်လာတဲ့ ဈေးကွက်ထဲမှာ Consumer AI ကဏ္ဍကို အရှိန်မြှင့်ဖို့အတွက် ကြာသပတေးနေ့ကစပြီး သူတို့ရဲ့ AI စမတ်မျက်မှန်တွေကို စတင်ရောင်းချလိုက်ပါတယ်။ ပြီးခဲ့တဲ့ ဇူလိုင်လတုန်းက အစောပိုင်းမိတ်ဆက်ခဲ့တဲ့ ဒီ “Quark AI Glasses” ကို မော်ဒယ်နှစ်မျိုးနဲ့ ရနိုင်မှာဖြစ်ပြီး S1 မော်ဒယ်ကို ယွမ် ၃,၇၉၉ (ဒေါ်လာ ၅၃၆ ခန့်) နဲ့ G1 မော်ဒယ်ကိုတော့ ယွမ် ၁,၈၉၉ ကျသင့်မှာ ဖြစ်ပါတယ်။
ဒီမျက်မှန်တွေမှာ Alibaba ရဲ့ ChatGPT လို့ ပြောလို့ရတဲ့ Qwen AI မော်ဒယ်တွေကို ထည့်သွင်းထားပြီး Qwen app နဲ့လည်း ချိတ်ဆက်အသုံးပြုနိုင်မှာပါ။ မှန်ဘီလူးတွေက မျက်နှာပြင် (Screen) အဖြစ် လုပ်ဆောင်ပေးသလို ဘောင်မှာ ကင်မရာပါဝင်တဲ့အတွက် အသံနဲ့ ခိုင်းစေတာတွေ လုပ်နိုင်ပါတယ်။ အထူးခြားဆုံး လုပ်ဆောင်ချက်တွေကတော့ သွားရင်းလာရင်း စကားပြန်ဘာသာပြန်ပေးတာ၊ AI နဲ့ အစည်းအဝေးမှတ်တမ်း ရေးပေးတာနဲ့ ကုန်ပစ္စည်းတွေကို ကြည့်လိုက်ရုံနဲ့ Taobao ပေါ်က ဈေးနှုန်းတွေကို တန်းပြပေးတာတွေပဲ ဖြစ်ပါတယ်။
အမေရိကန်ကုမ္ပဏီကြီး Meta လိုပဲ Alibaba ကလည်း စမတ်မျက်မှန်တွေဟာ စမတ်ဖုန်းတွေပြီးရင် နောက်ထပ်ခေတ်စားလာမယ့် ပစ္စည်းဖြစ်လာမယ်လို့ မျှော်လင့်ထားကြတာပါ။ Meta ကလည်း လက်ဟန်ခြေဟန်နဲ့ ထိန်းချုပ်နိုင်တဲ့ Ray-Ban မျက်မှန်တွေကို မကြာသေးခင်ကမှ မိတ်ဆက်ခဲ့တာ ဖြစ်ပါတယ်။ Alibaba ရဲ့ မျက်မှန်တွေကတော့ တရုတ်ဈေးကွက်ထဲမှာ Xiaomi နဲ့ Xreal တို့လို ပြည်တွင်းပြိုင်ဘက်တွေကို ယှဉ်ပြိုင်ရမှာပါ။
စမတ်မျက်မှန်ဈေးကွက်ဟာ အခုချိန်မှာ သေးငယ်သေးပေမယ့် ၂၀၂၆ ခုနှစ်ရောက်ရင် ရောင်းအား ၁၀ သန်းကျော်အထိ ရောက်လာမယ်လို့ ခန့်မှန်းထားကြပါတယ်။ Alibaba အနေနဲ့လည်း သူတို့ရဲ့ Cloud လုပ်ငန်းနဲ့ Qwen app အောင်မြင်မှုတွေကို အခြေခံပြီး ဒီဈေးကွက်ကို ထိုးဖောက်ဖို့ ပြင်ဆင်နေတာ ဖြစ်ပါတယ်။ သူတို့ဟာ တခြားပြိုင်ဘက်တွေဖြစ်တဲ့ Baidu နဲ့ Tencent တို့လိုပဲ AI ကဏ္ဍမှာ ငွေကြေးအမြောက်အမြား ရင်းနှီးမြှုပ်နှံပြီး မော်ဒယ်အသစ်တွေကို ဆက်တိုက်မိတ်ဆက်နေပါတယ်။
Ref : cnbc
