Facebook နဲ့ Instagram တို့ရဲ့ မိခင်ကုမ္ပဏီ Meta ဟာ AI နည်းပညာအပေါ် အဓိကထားပြီး လုပ်ငန်းလည်ပတ်မှုစနစ်ကို ပြောင်းလဲပြင်ဆင်ဖို့အတွက် လာမယ့် မေလ ၂၀ ရက်နေ့မှာ ဝန်ထမ်းတွေကို စတင်အလုပ်ထုတ်တော့မှာ ဖြစ်ပါတယ်။ ဒီတစ်ကြိမ်မှာတော့ ကုမ္ပဏီရဲ့ လုပ်သားအင်အား ၁၀ ရာခိုင်နှုန်းဝန်းကျင် ဒါမှမဟုတ် ဝန်ထမ်း ၈,၀၀၀ နီးပါးလောက် အလုပ်ထုတ်ခံရနိုင်တယ်လို့ သိရပါတယ်။ ဒါ့အပြင် ဒီနှစ် ဒုတိယနှစ်ဝက်မှာလည်း နောက်ထပ် အလုပ်ထုတ်မှုတွေ ရှိလာဦးမယ်လို့ ခန့်မှန်းထားကြပါတယ်။
အမှုဆောင်အရာရှိချုပ် Mark Zuckerberg ဟာ ကုမ္ပဏီအတွင်းပိုင်း လုပ်ငန်းစဉ်တွေကို AI နည်းပညာနဲ့ အစားထိုးဖို့အတွက် ဒေါ်လာဘီလီယံပေါင်းများစွာ ရင်းနှီးမြှုပ်နှံနေပြီး ဒါဟာ Amazon နဲ့ Block လိုမျိုး နည်းပညာကုမ္ပဏီကြီးတွေရဲ့ AI ကြောင့် ဝန်ထမ်းအင်အားလျှော့ချနေတဲ့ လမ်းစဉ်အတိုင်း လိုက်လုပ်နေတာလည်း ဖြစ်ပါတယ်။ အခုအခါမှာတော့ Meta ဟာ ကိုယ်တိုင် Code ရေးနိုင်တဲ့ AI နည်းပညာတွေ ပိုမိုမြန်ဆန်လာဖို့အတွက် “Applied AI” ဆိုတဲ့ အဖွဲ့အစည်းအသစ်ကိုပါ ဖွဲ့စည်းပြီး အင်ဂျင်နီယာတွေကို ပြန်လည်တာဝန်ချထားပေးနေပါတယ်။
Meta ရဲ့ ရှယ်ယာဈေးနှုန်းတွေ ပြန်တက်လာပြီး ဝင်ငွေကောင်းနေပေမယ့်လည်း ကုမ္ပဏီရဲ့ စီမံခန့်ခွဲမှုအဆင့်တွေကို လျှော့ချဖို့နဲ့ AI အကူအညီနဲ့ လုပ်ငန်းတွေ ပိုမိုထိရောက်လာဖို့အတွက် အခုလို အလုပ်ထုတ်မှုတွေကို ဆက်လုပ်နေတာ ဖြစ်ပါတယ်။ ဒါဟာ ၂၀၂၂ နဲ့ ၂၀၂၃ ခုနှစ်တွေမှာ ဝန်ထမ်း ၂၁,၀၀၀ ကျော်ကို အလုပ်ထုတ်ခဲ့တဲ့ “ထိရောက်မှုရှိစေမယ့်နှစ်” (Year of Efficiency) ပြီးနောက်ပိုင်း Meta ရဲ့ အကြီးမားဆုံး ဝန်ထမ်းလျှော့ချမှုတစ်ခုလည်း ဖြစ်လာမှာပါ။
Ref: Nation Thailand
