တူရကီနိုင်ငံမှာ ထူးထူးခြားခြားပဲ နိုင်ငံသားစာရင်း တရားဝင်သွင်းထားတဲ့ ပထမဆုံး လူတူစက်ရုပ်ဟာ မြူနီစီပယ်ကောင်စီ အစည်းအဝေးကို တက်ရောက်ပြီး ကောင်စီဝင်တွေရဲ့ မေးခွန်းတွေကို ဖြေကြားခဲ့ပါတယ်။ CANIKMAN လို့ အမည်ပေးထားတဲ့ အဲဒီစက်ရုပ်ဟာ မေလ ၅ ရက်နေ့က ဆမ်ဆန်းမြို့မှာ ကျင်းပခဲ့တဲ့ ကာနစ်မြူနီစီပယ်ကောင်စီ ဖွင့်ပွဲအစည်းအဝေးကို တရားဝင် ကိုယ်စားလှယ်တစ်ယောက်လို တက်ရောက်ခဲ့တာ ဖြစ်ပါတယ်။
အစည်းအဝေးအတွင်းမှာ CANIKMAN ဟာ တာဝန်ရှိသူတွေနဲ့ အပြန်အလှန် စကားပြောတာ၊ ဆွေးနွေးမှုတွေကို နားထောင်တာတွေအပြင် ကောင်စီဝင်တွေရဲ့ မေးခွန်းတွေကိုလည်း လူတစ်ယောက်လို ပြန်လည်ဖြေကြားခဲ့ပါတယ်။ အစည်းအဝေး မှတ်တမ်းဓာတ်ပုံတွေထဲမှာဆိုရင် CANIKMAN ဟာ ကောင်စီဝင်တွေရှေ့မှာ ရပ်နေတာ၊ ခန်းမထဲ လမ်းလျှောက်နေတာတွေအပြင် မဲခွဲဆုံးဖြတ်မှုတွေ လုပ်တဲ့အချိန်မှာ တာဝန်ရှိသူတွေနဲ့အတူ ဘေးချင်းယှဉ် ထိုင်နေတာကိုပါ တွေ့ရတာကြောင့် အဲဒီစက်ရုပ်ဟာ အနာဂတ်ရဲ့ အုပ်ချုပ်ရေးယန္တရားမှာ AI ရဲ့ အခန်းကဏ္ဍ ဘယ်လောက်အထိ ပါဝင်လာမလဲဆိုတာကို ပြသနေပါတယ်။
Ref : Technology Innovation
