Apple က စက်တင်ဘာလမှာ Watch SE စမတ်နာရီကို ပူပူနွေးနွေး ကြေညာခဲ့ပြီး ရောင်းချပေးထားပါတယ်။ အခုတော့ အဲဒီ စမတ်နာရီတွေမှာ ပြဿနာ အနည်းငယ် ရှိနေပါတယ်။ တောင်ကိုရီးယားက Apple Watch SE အနည်းဆုံး ၆ လုံးလောက်မှာ အပူလွန်ကဲတဲ့ ပြဿနာ ဖြစ်နေတယ်လို့ Reddit မှာ ပြောနေကြပါတယ်။
Apple Insider က အပူလွန်ကဲတဲ့ ပြဿနာဟာ Taptic Engine နဲ့ Digital Crown ကြား Display Connector အထက်နားမှာ ဖြစ်နေတယ်လို့ ပြောပါတယ်။ အပူလွန်ကဲမှုကြောင့် စမတ်နာရီ မျက်နှာပြင်မှာ အဝါရောင် အကွက် ဖြစ်နေတဲ့ ဓါတ်ပုံတွေကို ပိုင်ရှင်တွေက ပြသထားကြပါတယ်။
တချို့ ပိုင်ရှင်တွေက ကံကောင်းကြပြီး Charger မှာပဲ အပူလွန်ကဲကြပါတယ်။ ကံဆိုးတဲ့ လူတွေကတော့ စမတ်နာရီ ဝတ်ဆင်ထားချိန်မှာ လက်မှာ အပူလောင်တဲ့ ဒဏ်ကို ခံစားကြရပါတယ်။ အပူလွန်ကဲတဲ့ စမတ်နာရီ ၆ လုံးထဲက ၃ လုံးရဲ့ ပိုင်ရှင်တွေကိုတော့ ငွေပြန်အမ်းလိုက်ပြီ ဖြစ်ပြီး ကျန်တဲ့ လူတွေကတော့ Apple ဘယ်လို ဖြေရှင်းပေးမလဲဆိုတာ စောင့်နေကြပါတယ်။
ထင်ရတာက တောင်ကိုရီးယားက အလုံးရေ နည်းနည်းမှာပဲ ဒီပြဿနာ ဖြစ်နေတာပါ။ စမတ်နာရီ ဝယ်ယူပြီး ရက်ပိုင်း အနည်းငယ်အတွင်းမှာ အပူလွန်ကဲတဲ့ ပြဿနာ ဖြစ်တယ်လို့ သိရပါတယ်။ Apple ဟာ Watch Series 6 နဲ့အတူ တန်ဖိုးနည်း Watch SE ကို စက်တင်ဘာလက ကြေညာခဲ့တာဖြစ်ပါတယ်။
Ref : gsmarena
