နာမည်ကြီး Mobile Processor တွေထုတ်လုပ်သူဖြစ်တဲ့ Qualcomm ကုမ္ပဏီဟာ Apple ကို ပြီးခဲ့တဲ့ စက်တင်ဘာလ ၂၉ ရက်ထဲက တရုတ်နိုင်ငံမှာ မူပိုင်ခွင့်အလွဲသုံးစားလုပ်မှုနဲ့ တရားစွဲဆိုထားတာဖြစ်ပါတယ်။
ယခုနောက်ဆုံး သိရတဲ့သတင်းတွေအရတော့ Qualcomm ကုမ္ပဏီက တီထွင်ထားတဲ့နည်းပညာတွေကို Apple က ဝယ်ယူခြင်း (သို့မဟုတ်) ဌားရမ်းခြင်းမရှိပဲ အသုံးပြုနေတာဖြစ်တယ်လို့ ဆိုပါတယ်။ အဲ့ဒီအတွက် တရားရုံးမှာ Apple ဟာ မူပိုင်ခွင့်ချိုးဖောက်မှု ၃ ခုနဲ့အထက်ဖြင့် တရားစွဲဆိုမှုကို ရင်ဆိုင်နေရပြီး Qualcomm အနေနဲ့လည်း ညှိနှုင်းခြင်းမပြုလုပ်ပဲ တရားရုံးကို Apple iPhone တွေကို တရုတ်နိုင်ငံမှာ ထုတ်လုပ်ရောင်းချနေမှုကိုပါ ပိတ်ပင်ဖို့ တွန်းအားပေးနေတာဖြစ်ပါတယ်။
တကယ်လို့သာ Apple ဟာ ယခုတရားခွင်မှာ ရှုံးနိမ့်သွားပြီး Apple iPhone တွေကို ရောင်းချလို့မရတော့ဘူးဆိုရင် ဆုံးရှုံးမှုက တော်တော်လေးကို ကြီးမားမှာဖြစ်ပြီး iPhone တွေအကုန်လုံးနီးပါးကို တရုတ်နိုင်ငံ Foxconn စက်ရုံမှာပဲ ထုတ်လုပ်တဲ့အတွက် ထုတ်လုပ်မှုတွေ အကုန်လုံးနီးပါး ရပ်ဆိုင်းသွားတဲ့အထိတောင် အခြေအနေဆိုးသွားနိုင်ပါတယ်။
Apple နဲ့ Qualcomm ကုမ္ပဏီနှစ်ခုဟာ အမြဲတမ်း အပြန်အလှန်တရားစွဲဆိုနေကြတာဖြစ်ပြီး ပြီးခဲ့တဲ့ ဇန်နဝါရီလကလည်း Apple ကနေ Qualcomm ကို မူပိုင်ခွင့်ဆိုင်ရာကစ္စရပ်အချို့ကြောင့် တရားစွဲဆိုခဲ့ပါသေးတယ်။ ဒါပေမယ့် အခုတစ်ကြိမ်ကတော့ တော်တော်လေးကိုကြီးမားတဲ့ကိစ္စရပ်တစ်ခုဖြစ်ပြီး Apple တရားစီရင်မှုမှာ ရှုံးနိမ့်သွားမလားဆိုတာကတော့ ဆက်လက်စောင့်ကြည့်ရမှာပါ။
