Midrange စီးရီးအသစ်အတွက် ပထမဆုံးအဖွဲ့ဝင်ကို မိတ်ဆက်တဲ့ LG

တောင်ကိုရီးယားအခြေစိုက် LG ကုမ္ပဏီဟာ အီစတာချိန်ခါကျရောက်တဲ့ တနင်္ဂနွေနေ့မှာ ထူးခြားတဲ့ကြေညာမှုတစ်ခုကို ပြုလုပ်လာခဲ့ပါတယ်။ LG Velvet လို့ အမည်ပေးထားတဲ့ စမတ်ဖုန်းကို ထုတ်ပြလာခဲ့ပေမယ့် သူ့ရဲ့ Specs တစ်ခုမှ မဖော်ပြခဲ့ပါဘူး။

LG Velvet ဟာ သူတို့အတွက် ဒီဇိုင်းအယူအဆအသစ်ကို ပထမဆုံးအသုံးပြုလာတဲ့ စမတ်ဖုန်းဖြစ်တယ်လို့ LG မှ ကြေညာမိတ်ဆက်ခဲ့ပေမယ့် Specs တစ်ခုကိုမှ မဖော်ပြခဲ့ဘဲ ဒီဖုန်းဟာ ကိုရီးယားကုမ္ပဏီအနေနဲ့ Specs ကိုပဲ အာရုံစိုက်ကြမယ့်အစား ဒီဇိုင်းပိုင်းကို အသားပေးကြေညာလာမယ့် ထုတ်ကုန်တွေရဲ့ ဦးဆုံးဖောက်ထွက်သူလို့ သတ်မှတ်လာတာ ဖြစ်ပါတယ်။ ဖုန်းရဲ့လိုဂိုကလွဲရင် လောလောဆယ် ဘာမှကို သေသေချာချာ မသိရသေးတာပါ။

Velvet ဆိုတဲ့အမည်ကိုမကြေညာခင် ရှေ့ရက်မှာ ဒီဖုန်းရဲ့နောက်ကျောဘက်က ရေစက်ကျနေတဲ့ပုံသဏ္ဍာန် ကင်မရာဒီဇိုင်းကိုလည်း မြင်ခဲ့ရပြီးသားပါ။ ဒါပေမယ့် ကတ္တီပါ လို့အဓိပ္ပါယ်ထွက်တဲ့ Velvet အမည်နဲ့တော့ သိပ်မလိုက်ဖက်ဘဲ အနာဂါတ်ဆန်ဆန်ဒီဇိုင်းက သတ္ထုကိုယ်ထည်လို ထင်းထင်းကြီးဖြစ်နေတာ တွေ့ရမှာပါ။

ဒီဖုန်းဟာ LG ရဲ့ G စီးရီးနေရာကို အစားထိုးလာမယ့် Midrange လိုင်းအပ်အသစ်လို့ သတင်းထွက်ထားပါတယ်။ LG အနေနဲ့ Velvet ထုတ်ကုန်လိုင်းနဲ့ Midrange ဈေးကွက်ကို ပြန်လုမယ့်ပုံပါပဲ။ ဒါပေမယ့် Specs တွေသာမက ဈေးနှုန်းကိုလည်း မဖော်ပြသေးတာကြောင့် အတိအကျတော့ ပြောလို့မရသေးပါဘူး။